ދަރިފުޅު އިމްތިހާނުން ފާސް ނުވެދާނެތީ ކަންބޮޑުވެ، ފިކުރު ބޮޑު ވަނީ ހެއްޔެވެ؟ ދަސްކުރާ ފިލާވަޅު ދަރިފުޅު ހަނދާން ނުހުންނާތީ އެކަމާ ހާސް ވަނީ ހެއްޔެވެ؟ ހަމައެއާ އެކު ފިލާވަޅުތައް ދަސްކުރުމުގައި ދަރިފުޅަަށް ދަތިވަނީ ހެއްޔެވެ؟
މި ސުވާލުތައް ސިކުނޑި ތެރޭގައި އެނބުރޭ ބެލެނިވެރިންނަށް ދޭނެ ވަރަށް ފުރިހަމަ ޖަވާބެއް މިހާރު ހޯދިއްޖެ އެވެ. އެކަން ކުރީ އިނގިރޭސިވިލާތުގެ ނޮދަންބްރިއާ ޔުނިވަސިޓީގެ ޕްރޮފެސަރުންނެވެ.
އެ މީހުން ބުނާ ގޮތުގައި ދަރިފުޅުގެ ހަނދާން ގަދަ ކުރުމަށްޓަކައި ރޯޒްމޭރީ އެރޯމާ ނުވަތަ އޭގެ ވަސް މުހިއްމު ދައުރެއް އަދާ ކުރެ އެވެ.
އެހެންވެ ރޯޒްމޭރީގެ ވަސް ހުންނަ އުއްބައްތި އާއި ތެޔޮ އަދި ސްޕްރޭ ފަދަ ތަކެތި ގޭގެ ކޮޓަރިތެރެއާއި ދަރިފުޅު ފިލާވަޅު ދަސް ކުރަން އިންނަ ތަނުގައި ބޭނުން ކުރުމުން އެދެވޭ ނަތީޖާއެއް ނެރެދޭނެ އެވެ.
މި ބާވަތްތައް މިހާރު ބާޒާރުން ހޯދުމަކީ އުނދަގޫ ކަމަކަށް ނުވާނެ އެވެ.
މި ދިރާސާ ހެދުމުގައި ބައިވެރިވި މާކް ބޮސް ބުނީ ރޯޒްމޭރީގެ ވަހަކީ ހަނދާން ގަދަކޮށް ދިނުމަށް ބާރު އަޅައިދޭ އެއްޗެކެވެ. އެހެންވެ ދަރިފުޅު ހުންނަ ތަންތަނަށް އެވަސް ފަތުރައިލާށެވެ.
އޭނާ ބުނީ މި ދިރާސާ ހަދަން ބޭނުން ކުރި ދަރިވަރުންގެ ނަތީޖާތަކަށް ބަލާ އިރު، ރޯޒްމޭރީގެ ވަހުން ފުރިފައިވާ މާހައުލެއްގައި ތިބެގެން ފިލާވަޅުތައް ދަސްކުރި ކުދިންނާއި އާދައިގެ މާހައުލެއްގައި ފިލާވަޅު ދަސް ކުރި ކުދިންގެ ނަތީޖާ އަށް ބަލާ އިރު، ރޯޒްމޭރީގެ ވަހާ އެކު ފިލާވަޅުތައް ދަސްކުރި ދަރިވަރުން ނެރުނު ނަތީޖާތައް މާ ބޮޑަށް ވެސް ރަނގަޅު ކަމަށެވެ.
އެހެންވެ މިއިން ދައްކުވައި ދެނީ ރޯޒްމޭރީގައި ހަނދާން ގަދަކޮށް ދިނުމުގެ ބާރު ހުރިކަން ކަމަށް މާކް ބުންޏެވެ.