ހިތަދޫ ޝަރަފުއްދީން ސްކޫލްގައި ތައުލީމް ޙާސިލް ކުރަމުންދާ ޚާއްސަ އެހީ އަށް ބޭނުންވާ ކުއްޖަކަށް އިންސާނީ ހައްގުތަކަށް މަސައްކަތް ކުރައްވާ އެމްބެސެޑަރު އަހުމަދު ހިޝާން އިލެކްޓްރިކް ވީލްޗެއާއެއް ހަދިޔާކޮށްފި އެވެ.
ހާއްސަ އެހީއަށް ބޭނުންވާ ކުދިންނަށް އެހީތެރިވުމުގައި އުޅުއްވާ އަހުމަދު ހިޝާން އިލެކްޓްރިކް ވީލްޗެއާއެއް ހަދިޔާކޮށްފައި ވަނީ، ހިތަދޫ އަށް ނިސްބަތްވާ އުމުރުން 10 އަހަރުގެ މާޒް މޫސާ އަށެވެ.
މާޒަކީ އުފަން ވިއިރުވެސް އުނގަޑުން ތިރީގައި ވާގި ނެތް ކުއްޖެކެވެ. އެހެންވެ އޭނާ އެއްތަނުން އަނެއްތަނަށް ދާން ޖެހެނީ އަބަދުވެސް ކޮންމެވެސް މީހެއްގެ އެހީތެރިކަމާ އެކުގަ އެވެ.
މާޒްގެ އާއިލާގެ މެމްބަރަކު 'އައްޑޫލައިވް' އާ ވާހަކަ ދައްކަމުން ބުނިގޮތުގައި އާއިލާގެ އެންމެންގެ ފަރާތުން މާޒަށް އަބަދުވެސް އެހީތެރިކަން ވަރަށް ފުރިހަމައަށް ފޯރުކޮށްދޭ ކަމަށެވެ.
"މާޒުގެ މަންމަ އާއި ބައްޕަ އަދި އާއިލާގެ އެންމެން ވެސް ވަރަށް އެހީތެރިކަން ފޯރުކޮށްދޭ، އެހެން ނަމަވެސް އަބަދުވެސް މީހަކަށް ގޮވައިގެން އެއްތަނުން އަނެއްތަނަށް މިދަނީ. އެކަމާއި ވަރަށް ދެރަވެފައި ހުންނަނީ. އެހެން ނަމަވެސް މިއަދު އެކަމަށް ނިމުމެއް އައިސްފި"
އާއިލާގެ ފަރާތުން ވާހަކަ ދެއްކި މީހާ ބުނި ގޮތުގައި މީގެ ކުރިން މާޒް ގޭ ތެރޭގައި އުޅެނީ ސުކޭޓް ބޯޑުގައި ކަމަށެވެ. އަދި ސްކޫލަށް ގެންދިއުމުން ސްކޫލްގެ ފަރާތުން އެހީތެރިކަން ލިބޭކަން އާއިލާއިން ފާހަގަކުރިއެވެ.
މާޒް އާއި އާއިލާގެ މެންބަރުން އުފަލުން ފޮޅިފައި!
މާޒުގެ އާއިލާގެ އެންމެން ވެސް ބުނާ ގޮތުގައި އިލެކްޓްރިކް ޗެއަރ އެއްގެ އެހީގައި މާޒް އަށް އަމިއްލަ އަށް އެއްތަނުން އަނެއްތަނަށް ދެވޭ ގޮތް ވުމަކީ ލިބުނު ބޮޑު އުފަލެއް ކަމަށެވެ. ވީލް ޗެއަރގައި މާޒު ހަރަކާތްތެރިވާ މަންޒަރު ފެނުމުން "އުފަލުން ރޮވޭ" ކަމަށް އާއިލާގެ ފަރާތުން ވާހަކަ ދެއްކި މާޒުގެ އާއިލާގެ މެންބަރަކު ބުންޏެވެ.
މާޒުގެ އާއިލާއިން ސިފަކުރާ ގޮތުގައި މިއަދު ލިބުނު ގޮނޑިއާއެކު "މާޒު މިނިވަންވެއްޖެ ކަމަށާއި އެއީ ބޮޑު އުފަލެއް" ކަމަށެވެ.
"މާޒް ކޮއްކޮ އެ ގޮނޑީގައި އުޅޭތަން ފެނުމުން އުފަލުން ރޮވޭ. މިކަން ފުރިހަމަކޮށްދިނުމަށް އެހީތެރިވި ހުރިހާ ބަޔަކަށް ޝުކުރުވެރިވަން. ހާއްސަކޮށް ހިޝާން އަށް. މިފަދަ އެހީތެރިކަން ފޯރުކޮށްދޭ ފަރާތްތަކަށް ﷲ ހެޔޮ ރަޙްމަތްލެއްވުން އެދި ދުޢާކުރަން."
'އައްޑޫލައިވް' އާ ވާހަކަ ދައްކަވަމުން ހިޝާން ވަނީ ރައްޔިތުންގެ މަޖިލީހުގަައި 85 މެންބަރުން ތިއްބަވާ އިރު، އައްޑު އަށް ދަތުރު ކުރައްވަން ނިންމެވުމުން މެންބަރު ނިޒާރު އެކަމަށް އިސްނަންގަވައި އެހީތެރިވެދެއްވި ކަން ފާހަގަ ކުރައްވާފައެވެ.
ހިޝާން ވިދާޅުވި ގޮތުގައި އޭނާ ކުރައްވާ މަސައްކަތަށް އެކި ފަރާތްތަކުން ވަރަށް ބޮޑެތި އެހީތެރިކަމެއް ފޯރުކޮށް ދެމުން ގެންދާ ކަމަށެވެ.
އެ ފަރާތްތަކުގެ އެހީތެރިކަމާ އެކު ހިޝާން ވަނީ ރާއްޖޭގެ އެކި ކަންކޮޅުތަކުގައި ދިރިއުޅޭ ހާއްސަ އެހީއަށް ބޭނުންވާ 21 ފަރާތަކަށް ގޮނޑި ހަދިޔާކޮށްދީފަ އެވެ.
ހިޝާން ވިދާޅުވާ ގޮތުގައި އޭނާގެ މަގްސަދަކީ، ހާއްސަ އެހީއަށް ބޭނުންވާ ފަރާތްތަކަށް މިނިވަންކަން ހޯދައި ދިނުމެވެ. އުފާވެރިކަން އިހްސާސް ކުރެވޭނެ މަގު ފަހިކޮށް ދިނުން ކަމަށެވެ.