ފިލްމް ކުޅުން ހުއްޓާލައި ބޮލީވުޑްގެ އެކްޓަރު އަބިޝެކް ބައްޗަން އިންޑިއާ ސަރުކާރުގެ ވަޒީފާއަކަށް ކުރިމަތިލާފައިވާ ކަމަށް ބުނާ ލިޔުމެއް އިންޓަނެޓްގައި ހުމެއްހެން ފެތުރެން ފަށައިފި އެވެ.
އަބިޝެކްގެ ފޮޓޯ ވެސް ޖަހާފައިވާ މި ވަޒީފާގެ ފޯމް ވަނީ އިންޑިއާގެ ސްޓާފް ސިކެލްކްޝަން ކޮމިޑީ (އެސްއެސްސީ) ގެ ރަސްމީ ވެބްސައިޓްގައި ވެސް ހިމަނައިފަ އެވެ.
މިކަމާ ގުޅިގެން ވަރަށް ގިނަ ބަޔަކު ވަނީ ޓްވިޓާގައި، ތަފާތު ގޮތްގޮތަށް ހިޔާލު ފާޅުކޮށްފަ އެވެ.
އެއް ބަޔަކު ބުނެފައި ވަނީ އެއީ އަބިޝެކް ކުރަން މިހާރު ވެސް މާ ބޮޑަށް ލަސްވެއްޖެ ކަމެއް ކަމަށެވެ.
ރިޕޯޓްތައް ބުނާ ގޮތުން އަބިޝެކް "ކުރިމަތިލި" ވަޒީފާ އަށް މުވައްޒަފަކު ހޮވަން ބާއްވާ އިމްތިހާން މިދިޔަ މަހުގެ 30 ގައި ޖެއިޕޫރްގައި ވަނީ ބާއްވައިފަ އެވެ.
އަބީޝެކްގެ ފޮޓޯ ޖެހި "ވަޒީފާގެ ފޯމް" ދައުރުވާން ފެށުމުން އެސްއެސްސީން ވަނީ އެކަން ހިނގާފައި އޮތް ގޮތް މިހާރު ސާފުކޮށް ދީފަ އެވެ.
އެތަނުން ބުނީ އަބިޝެކްގެ ފޮޓޯއަކާ އެކު ފޯމް ހުށަހަޅާފައި ވަނީ ކާކުކަން ނޭނގޭ މީހެއް ކަމަށެވެ.
މިކަމާ ބެހޭ ގޮތުން އަބިޝެކް އަދި އެއްވެސް ވާހަކައެއް ނުދައްކަ އެވެ.
In apparent prank,admit card with 'name', pic of @juniorbachchan appears on official website of SSC for multi-tasking (non-tech) staff exam pic.twitter.com/x1nPDKIbRX
— Press Trust of India (@PTI_News) May 3, 2017
އޭނާއަކީ ބޮލީވުޑްގެ ސްޕަސްޓާ އަމީތާބް ބައްޗަންގެ ދަރިއެކެވެ. އަދި މަޝްހޫރު ބަތަލާ އައިޝްވާރިއާ ރާއީގެ ފިރިމީހާ އެވެ.
މިހާތަނަށް އަބިޝެކަށް ބޮލީވުޑްގައި މާ ބޮޑު ކުރިއެރުމެއް ހޯދިފައެއް ނުވެ އެވެ.
އެހެންވެ އެއީ ފެއިލްވެފައިވާ އެކްޓަރެއް ކަމަށް ބުނެ ވަރަށް ގިނަ ބަޔަކު އަބިޝެކަށް މަލާމާތް ކުރެ އެވެ.