ކެންސަރަށް ފަރުވާ ހޯދުމަށް ފަހު، މިހާރު ރަނގަޅުވެފައިވާ، ބޮލީވުޑްގެ ކުރީގެ މަޝްހޫރު ބަތަލާ މަނީޝާ ކޮއިރަލާ ބޮޑު ސްކްރީނަށް އެނބުރި އަންނަ ފިލްމް "ޑިއާ މާޔާ" ގެ ޓްރެއިލާ ދައްކާލައިފި އެވެ.
މި ފިލްމަކީ އޭނާ ވަރަށް ތަފާތު ރޯލަކުން ފެނިގެން ދާނެ ފިލްމެކެވެ. މީގެ ޑައިރެކްޓަރަކީ ސުނައިނާ ބަޓްނާގަރު އެވެ.
އަންނަ މަހުގެ 2 ގައި ސިނަމާތަކަށް އަންނަ "ޑިއާ މާޔާ" ގައި މަނީޝާ ފެންނަނީ ތަންކޮޅެއް މުސްކުޅި ކެރެކްޓާއަކުންނެވެ.
ދެހާސް ތޭރަ ވަނަ އަހަރުގެ ތެރޭގައި މަނީޝާ އަށް ކެންސަރު ޖެހިގެން އެމެރިކާގައި ވަނީ ފަރުވާ ހޯދައިފަ އެވެ. އަދި އެ ބަލީގެ ތެރޭގައި ކީމޯތެރަޕީގެ ހަމަލާތަލާ އެކު މަނީޝާގެ ބޮލުގެ އިސްތަށިގަނޑު ވެސް ވަނީ އެއްކޮށް ގޮސްފަ އެވެ.
އެހެން ނަމަވެސް ބަލިން އެއްކޮށް މަނީޝާ މިހާރު ވަނީ ސަލާމަތްވެ، އަލުން ފިލްމް ކުޅެން ފަށައިފަ އެވެ.
މި އަހަރު ފަހުކޮޅު ރިލީޒް ކުރާ ސަންޖޭ ދަތުގެ ބައޮޕިކްގައި ސަންޖޭގެ ރޯލް ކުޅޭ ރަންބީރު ކަޕޫރުގެ މަންމަގެ ރޯލުން ފެނިގެން ދާނީ ވެސް މަނީޝާ އެވެ.
އެ ފިލްމުގައި އޭނާ ކުޅެނީ ސަންޖޭގެ މަންމަ ނަރްގިސްގެ ރޯލެވެ.