ތިން ފަހަރު ނެޝަނަލް އެވޯޑް ހޯދާފައިވާ އަދި ކާމިޔާބު ފިލްމްތަކެއް ކުޅެފައިވާ ބަތަލާ ކަންގަނާ ރަނާވަތު ފިލްމެއް ޑައިރެކްޓް ކުރަން ތައްޔާރުވާން ފަށައިފި އެވެ.
އޭނާ އަލަށް ޑައިރެކްޓް ކުރާ ފުރަތަމަ ފިލްމުގެ މަސައްކަތް ފަށާނީ، އަލަށް ކުޅެން ފެށި ވިޖެޔަންދްރަ ޕްރަސާދްގެ ފިލްމް "މަނިކަރްނިކާ: ދަ ކްއީން އޮފް ޖާންސީ" ގެ މަސައްކަތް ނިންމައިލުމަށް ފަހު އެވެ.
އެ ފިލްމުގެ ޕޯސްޓަރު ލޯންޗް ކުރަން ބޭއްވި ހަފުލާގައި ކަންގަނާ ބުނީ ދެން މިސްރާބު ޖަހަން ބޭނުން ވަނީ އެހެން ދިމާލަކަށް ކަމަށެވެ. އެގޮތުން ޑައިރެކްޝަނަށް ވަަރަށް ބޮޑަށް ޝައުގުވެރިވާ ކަމަށް ބުންޏެވެ.
"މަނިކަރްނިކާ ނިންމާލާފައި ފިލްމެއް ޑައިރެކްޓް ކުރާނަން. އެ ފިލްމް ވާނީ ކޮމެޑީއަކަށް،" އޭނާ ބުންޏެވެ.
ކަންގަނާ ވަނީ އެމެރިކާގެ ކުރިން ސްކްރިޕްޓް ރައިޓިން ކޯހެއް ވެސް ފުރިހަމަކޮށްފަ އެވެ. އޭނާ ދާދި ފަހުން ޝޫޓިން ނިންމާލި ހެންސަލް މެހެތާގެ ސްކްރިޕްޓް އެކުލަވާލުމުގައި ވެސް ކަންގަނާ ހިއްސާވި އެވެ.
އެހެންވެ އޭނާ ޑައިރެކްޓް ކުރާ ފިލްމް ލިޔާނީ ވެސް ކަންގަނާ އެވެ.
އޭނާ އަދި ބުނީ ޑައިރެކްޝަން ހެދިޔަސް، އެކްޓިން އެއްކޮށް ދޫކޮށް ނުލާނެ ކަމަށެވެ.
"ފަހަރުގައި އަހަރެން ޑައިރެކްޓް ކުރާ ފިލްމުން އަހަރެން ފެނިވެސް ދާނެ" ކްއީން އާއި ތަނޫ ވެޑްސް މަނޫ ރިޓާންގެ އިތުރުން ފެޝަން އިން ނެޝަނަލް އެވޯޑް ހޯދި ބަތަލާ ބުންޏެވެ.
އޭނާ އެންމެ ފަހުން ފެނިގެން ދިޔައީ ޝާހިދް ކަޕޫރާއި ސައިފް އަލީ ހާނާ އެކު ދާދި ފަހުން ރިލީޒް ކުރި "ރަންގޫން" އިންނެވެ.
އެކަމަކު ވިޝާލް ބަރަދްވާޖް ޑައިރެކްޓް ކުރި އެ ފިލްމަކީ ބޮޑު ފްލޮޕެކެވެ.