1. ލޯ-ފެޓް
ފެހި ކުލައިގެ މޭވާ އާއި ތަރުކާރީ އަކީ ލޯ-ފެޓް އެއްޗެހި އެވެ. މީގެ އިތުރުން އޭގައި ގިނަ އަދަދަކަށް ވިޓަމިންސް އެކުލެވިގެންވުމުން ހަށިގަނޑުގައި އިތުރަށް ހުންނަ ފެޓްސް މަދުކޮށް ދެއެވެ.
2. ހަޖަމުކުރުމުގެ ނިޒާމަށް އޮތް ފަސޭހައެއް
ބްރޮކޮލީ، ކެބެޖު، ފެހި ކުލައިގެ ފަތްތައް އަދި ބީންސް އަކީ ފައިބާ އިން ފުރިގެންވާ ކާއެއްޗެހި އެވެ. އެ އެއްޗެހީގައި ހިމެނޭ ފައިބާ އަކީ ހަޖަމު ކުރުމަށް އެހީވެދީ ފަސޭހައިން ބޮޑުކަމުދިއުމަށް އެހީތެރިވެދޭ މާއްދާ އެކެވެ. އެހެންކަމުން ފެހި ކުލައިގެ ކާއެއްޗެހި ކެއުމުން ގޮހޮރު ދުޅަހެޔޮވެއެވެ.
3. އާ ސެލްތައް އުފައްދައިދޭ
ފޯލިކް އެސިޑް އަކީ ހަށިގަނޑުގައި އާ ސެލްތައް އުފައްދައި ދެމެހެއްޓުމަށް އެހީތެރިވެދޭ މާއްދާއެކެވެ. ޕީސް، ބީންސް އަދި އެސްޕެރެގަސް ފަދަ ފެހި ކާއެއްޗެހި އަކީ ފޯލިކް އެސިޑް ގިނަ އަދަދަކަށް އެކުލެވިގެންވާ އެއްޗެހި އެވެ.
4. ލޮލަށް ރަނގަޅު
ފެހި ކުލައިގެ ކާއެއްޗެހީގައި ލޫޓީން އާއި ޒީކްސެންތިން ފަދަ ފައިޓޯކެމިކަލްސް ހުރެއެވެ. މި ފައިޜޯކެމިކަލްސް އަކީ އުމުރުން ދުވަސްވެފައިވާ މީހުންގެ ލޯފަންވުމަށް ދިމާވާ އެންމެ މައިގަނޑު ސަބަބުތައް ކަމަށްވާ ކެޓެރެކްޓް އާއި މެކިއުލާ ޑީޖެނެރޭޝަން ޖެހުމުގެ ފުރުސަތު ކުޑަކޮށްދޭ މާއްދާތަކެކެވެ. މީގެ އިތުރުން އެ ކެމިކަލްތަކަކީ ބައެއް ވައްތަރުގެ ކެންސަރު ޖެހުމުގެ ފުރުސަތުވެސް ކުޑަކޮށްދޭ މާއްދާތަކެކެވެ.
5. އެންޓި-ކެންސަރު
ކުއަސެޓިން އަކީ ފެހި ކުލައިގެ ކާއެއްޗެހީގައި ހިމެނޭ ބައޯފްލޭވޮނޮއިޑް އެކެވެ. މި ފްލެވޮނޮއިޑްގައި އެންޓިއެކްސޮޑެންޓްތައް ހިމެނިގެން ވުމުގެ އިތުރުން އެންޓި-ކެންސަރު މާއްދާތަކެއް ވެސް ހިމެނެ އެވެ.
6. ހަކުރު ބައްޔާރި ރައްޓެހި
ގްލައިސީމިކް އިންޑެކްސް ނުވަތަ ޖީއައި އަކީ ކާބޯހައިޑްރޭޓް އިން ފުރިގެންވާ ކާއެއްޗެހި މިނާ، އޭގެ ސަބަބުން ހަށިގަނޑުގައި ހަކުރު ހުންނަ މިންވަރަށް އަންނަ ބަދަލުތައް މޮނީޓާ ކުރުމަށް ބޭނުންކުރާ ކޮންސެޕްޓް އެކެވެ. ފެހި ކުލައިގެ ކާއެއްޗެއްސަކީ ޖީއައި މަދުން ހުންނަ އެއްޗެހި އެވެ. އެހެންކަމުން ހަކުރު ބަލި ޖެހިފައިވާ މީހުންނަށް ފެހި ކުލައިގެ ކާއެއްޗެހި އަކީ އޮތް ފަރުވާ އެކެވެ.
7. މަސްތަކަށާއި ކަށިތަކަށް ރަނގަޅު
ފެހި ކުލައިގެ ކާއެއްޗެހީގައި ގިނަ އަދަދަކަށް އަޔަން އާއި ކެލްސިއަމް އެކުލެވިގެން ވެއެވެ. އަޔަން އާއި ކެލްސިއަމް އަކީ ކަށިތައް ވަރުގަދަ ކޮށްދީ، މަސްތަކުގެ މަސައްކަތް ފަސޭހަކޮށްދީ އަދި އަވަހަށް ލޭމަނާވުމަށް މަގުފަހިކޮށްދޭ މާއްދާތަކެކެވެ.
8. ދިފާޢީ ބާރު ވަރުގަދަކޮށްދޭ
ފެހި ކުލައިގެ ކާއެއްޗެހީގައި ބީޓާ ކެރޮޓީން އެކުލެވިގެންވެއެވެ. އެއީ ވިޓަމިން އޭ އަށް ބަދަލުކޮށްލެވޭ މާއްދާ އެކެވެ. އެހެންކަމުން ފެހި ކާއެއްޗެހި ކެއުމަކީ ހަށިގަނޑުގެ ދިފާޢީ ބާރު އިތުރަށް ވަރުގަދަކޮށްދޭ ކަމެކެވެ.