ޔޫޓިބިއުބްގައި މިހާތަނަށް އެންމެ ގިނަ ބަޔަކު ބެލި ހިންދީ ލަވައިގެ ރެކޯޑް މިދިޔަ އަހަރު ރިލީޒް ކުރި "ބޭފިކްރޭ" ގެ ލަވަ "ނަޝޭ ސި ޗަޅް ގައީ" އަށް ލިބިއްޖެ އެވެ.
މި ފިލްމަކީ ޔާޝްރާޖް ފިލްމްސް (ވައިއާރްއެފް) އިން އުފައްދައި، އަދިތިޔާ ޗޯޕްޅާ ޑައިރެކްޓްކޮށްފައިވާ ފިލްމެކެވެ.
ފްރާންސްގައި މަންޒަރުތައް ނަގާފައިވާ "ބޭފިކްރޭ" ގައި ލީޑް ރޯލް ކުޅެފައި ވަނީ ރަންވީރު ސިންގް އާއި ވާނީ ކަޕޫރެވެ.
އެ ފިލްމަށް ވިޝާލް/ޝޭކަރު މިއުޒިކް ތައްޔާރުކޮށް ދިން އިރު، "ނަޝޭ ސި ޗަޅް ގައީ" ލަވަ ކިޔާފައި ވަނީ މަޝްހޫރު ލަވަ ކިޔުންތެރިޔާ އަރިޖުތު ސިންގެވެ.
މި ލަވަ ޔޫޓިއުބުން ބެލި މީހުންގެ އަދަދު ވަނީ 230 މިލިއަނަށް ވުރެ މައްޗަށް އަރައިފަ އެވެ.
އަދި ހަމަމިއާ އެކު "ނަޝޭ ސި ޗަޅް ގައީ" މި ލަވައަކީ ޔޫޓިއުބަށް ދޫކޮށްލިތާ 24 ގަޑި އިރު ތެރޭގައި އެންމެ ގިނަ ބަޔަކު ބެލި ހިންދީ ލަވައިގެ ރެކޯޑް ވެސް އޮތް ލަވަ އެވެ.
ލަވައަށް ލިބެމުން އަންނަ ތަރުހީބާ ބެހޭ ގޮތުން ވައިއާރްއެފްގެ ވައިސް ޕްރެޒިޑެންޓް އާނަންދު ގްރުނާނީ ބުނީ މިއީ ޔާޝްރާޖަށް ލިބުނު ވަރަށް ބޮޑު ޝަރަފެއް ކަމަށެވެ. އަދި މުޅި ޓީމް ވަރަށް އުފާވެފައި ތިބި ކަމަށެވެ.