މުޅި އިންޑިއާ އެ ފިލްމަކާ ދޭތެރޭ ފަހުރުވެރިވާ "ބާހްބަލީ" ފްރެންޗައިޒްގެ ދެވަނަ ފިލްމް "ބާހްބަލީ: ދަ ކޮންކްލޫޝަން" ބޮކްސް އޮފީހުގައި 1،000 ކްރޯޑް ރުޕީސްގެ އާމްދަނީއެއް ފަހަނައަޅައި، ތާރީހުން ޖާގަ ހޯދައިފި އެވެ.
މިއީ އިންޑިއާގެ ފިލްމެއްގެ އާމްދަނީ 1،000 ކްރޯޑް ރުޕީސް އަށް ވުރެ މައްޗަށް ދިޔަ ފުރަތަމަ ފަހަރެވެ.
ފިލްމީ ހަބަރުތައް ދިރާސާ ކުރާ ފަރާތްތަކުން ބުނާ ގޮތުގައި "ބާހްބަލީ 2" އިން ހެދި ރެކޯޑްތައް ކައިރި މުސްތަގުބަލެއްގައި އެހެން ފިލްމަކަށް މުގުރައިލެވުމަކީ ވަރަށް ނާދިރު ކަމެކެވެ.
މިދިޔަ މަހުގެ 28 ގައި ރިލީޒް ކުރި "ބާހްބަލީ 2" އިންޑިއާގެ ބޮކްސް އޮފީހުގައި މިހާތަނަށް 300 ކްރޯޑް ރުޕީސް އަށް ވުރެ ބޮޑު އާމްދަނީއެއް ލިބިފައިވާ އިރު، ދުނިޔޭގެ އެކި ކަންކޮޅުތަކުގައި ފިލްމް ދައްކައިގެން މިހާތަނަށް ވަނީ 800 ކްރޯޑަށް ވުރެ ބޮޑު އާމްދަނީއެއް ލިބިފަ އެވެ.
މަޝްހޫރު ތެލެގޫ ޑައިރެކްޓަރު އެސްއެސް ރާޖަމޯލީ ޑައިރެކްޓް ކުރި "ބާހްބަލީ" ދެ ފިލްމް ހަދާފައި ވަނީ ޖުމްލަ 450 ކްރޯޑް ރުޕީސްގެ ބަޓެކުންނެވެ.
އިންޑިއާގައި މިހާތަނަށް އެންމެ ބޮޑު ހަރަދެއްކޮށްގެން ހެދި ފިލްމުގެ ރެކޯޑް ވެސް އޮތީ "ބާހްބަލީ" ގެ އަތުގަ އެވެ.
ރަސްކަމެއްގެ ދަހިވެތިކަމުގައި ހިނގާ ހަނގުރާމައެއްގެ މައްޗަށް ބިނާކޮށް ހަދާފައިވާ "ބާހްބަލީ" ގެ ލީޑް ރޯލް ކުޅެފައި ވަނީ ޕްރަބާސް، ތަމަންނާ ބާޓިއާ، ރާނާ ދަގޫޕަތީ އަދި އަނުޝްކާ ޝެޓީ، ރާމިޝާ ކްރިޝްނަން އަދި ސަތިއަރާޖް އެވެ.