ހުޅުމީދޫ އިންޖީނުގޭގެ މުވައްޒަފަކު ކުއްލި ގޮތަކަށް ށ. މަރޮށި ފެނަކައިގެ އިންޖީނުގެއަށް ބަދަލު ކުރަން ޗިޓް ފޮނުވައިފި އެވެ.
"އައްޑޫ ލައިވް" އަށް އެނގިފައިވާ ގޮތުގައި މި މަހުގެ 4 ވަނަ ދުވަހު ފެނަކަ ކޯޕަރޭޝަނުން ށ. މަރޮށި އިންޖީނުގެ އަށް ބަދަލު ކުރި މުވައްޒަފަކީ ހުޅުމީދޫ އިންޖީނުގޭގެ އޮފިސަރު މަގާމު އަދާކުރަމުން ދިޔަ ޝާފީ އަލީ އެވެ.
ނިމިގެން ދިޔަ ކައުންސިލް އިންތިހާބްގެ ވޯޓުލާން އެއް ދުވަހަށްވެފައި ވަނިކޮށް ޝާފީ ށ. މަރޮށީ އިންޖީނުގެ އަށް ބަދަލު ކުރިކަން އެންގީ 4 ވަނަ ދުވަހު ވަޒީފާއަށް ހުޅުމީދޫ އިންޖީނުގެއަށް ނިކުތުމުންނެވެ.
ޝާފީ ބަދަލު ކުރި ކަމުގެ ޗިޓް 3 ވަނަ ދުވަހު ފެނަކަ ހުޅުމީދޫ އިންޖީނުގެ އަށް ފޮނުވާފައިވީ ނަމަވެސް އެކަން އޮތީ ޝާފީ އަށް ނާންގައެވެ.
ޝާފީ މަރޮށީ އިންޖީނުގެއަށް ބަދަލުކުރި ޗިޓްގައި ވަނީ ޑިޕާޓްމަންޓް ބަދަލުކޮށްފައިވާތީ ހުޅުމީދޫ އިންޖީނުގެއިން މަރޮށީ އިންޖީނުގެ އަށް ބަދަލު ކުރީ ކަމަށެވެ.
ރައްޔިތުންނާއި ވަރަށް ގާތުން މަސައްކަތް ކުރާ މަޑުމައިތިރި މިޒާޖެއްގެ ޝާފީއަކީ ސ. ހުޅުދޫއަށް ނިސްބަތްވާ ޒުވާނެކެވެ. އޭނާ ހުޅުމީދޫ އިންޖީނުގޭގައި މަސައްކަތް ކުރާތާ 8 އަހަރު ަވނީ ވެފައެވެ.
ހުޅުދޫން ވާހަކަ ދެއްކި މީހަކު "އައްޑޫލައިވް"އަށް ބުނީ ޝާފީ ބަދަލު ކުރީ މިއަހަރުގެ މޭއި 1 ވަނަ ދުވަހު އިދިކޮޅު ފަރާތްތަކުން ހުޅުމީދޫގައި ބޭއްވި ޖަލްސާގެ ކަންކަމުގައި ހަރަކާތްތެރިވުމުންކަމަށް ރަށުތެރޭގައި ވާހަކަ ދެކެވޭ ކަމަށެވެ.
ޝާފީ ބަދަލުކުރިއިރު ފެނަކަ ކޯޕަރޭޝަންގެ ތިމަރަފުށީ އިންޖީނުގޭގެ ޑެޕިއުޓީ މެނޭޖަރ އިސްތިއުފާ ދިނުމަށްވެސް ވަނީ އަންގާފައެވެ.
ޝާފީ ބަދަލު ކުރި އިރު މި ފަހަރުގެ ކައުންސިލް އިންތިހާބްގައި ސަރުކާރު ހިންގާ ޕީޕީއެމްއަށް އައްޑޫ ސިޓީ ކައުންސިލްގެ އެއްވެސް ގޮނޑިއެއް ކާމިޔާބެއް ނުކުރެވެ އެވެ.
ހާއްސަކޮށް މީދޫ ދާއިރާއަށް ޕީޕީއެމްއިން ކުރިމަތިލި ކެންޑިޑޭޓަށް މީދޫގައި ބަހައްޓާފައި ހުރި ވޯޓު ފޮށިތަކުން ލިބިފައި ވަނީ އެންމެ 17 ވޯޓެވެ.
ވޯޓް ނަތީޖާއާ އެކު އައްޑޫގެ ބައެއް ސިޔާސީ މަގާމުތަަކަށް ބަދަލު ގެންނަ އުޅޭކަމުގެ އަޑުތައް ވަނީ ގަދަވެފަ އެވެ.