ޑާކް ރެއިން އެންޓަޓައިންމަންޓްގެ ރޮމޭންޓިކް ކޮމެޑީ "މީ ލޯތްބަކީ" މިރޭ އައްޑޫގެ ދެ ރަށެއްގައި އެޅުވުމުގެ އެންމެ ފަހުގެ ތައްޔާރީތައްވެއްޖެ އެވެ.
މިރޭ ފިލްމް ހިތަދު އާއި މަރަދޫގައި ދައްކާނެ އެވެ.
މިރޭ ފިލްމް އައްޑޫގައި އަޅުވާ އިރު، "މީ ލޯތްބަކީ" ގެ ކާސްޓުންގެ ތެރޭގައި ހިމެނޭ މުހައްމަދު ފައިސަލާއި އަލީ ޝަޒްލީމް ވެސް މިހާރު ހުރީ ތިބީ އައްޑޫގަ އެވެ.
ހިތަދޫގައި ޝޯތައް ދައްކަނީ އިވްރިވަންސް ލާނިންސް ސެންޓަރު (އީއެލްސީ) ގަ އެވެ. މަރަދޫގެ ޝޯތައް ކުރިއަށް ދާނީ ބޮޑޮގޭގަ އެވެ.
އައްޑޫގައި ފިލްމް އެޅުވުމުގެ ކަންކަމާ ހަވާލުވެފައިވާ އޮފިޝަލަކު "އައްޑޫ ލައިވް" އަށް މިއަދު ބުނީ ޓާގެޓަކީ ކޮންމެ ރަށެއްގައިި ހަތަރު ޝޯ ދެއްކުން ކަމަށެވެ.
"މިހާރު މިރެ އާއި މާދަމާ ރޭގެ ޝޯތައް ގާތްގަނޑަކަށް ހައުސްފުލްވެފައި ވަނީ. ކުރިއަށް ހުރި ޝޯތަކަށް ލިބޭ ތަރުހީބަށް ބަލާފައި ޝޯތައް އިތުރު ކުރަން ނިންމާފައި އޮތީ،" އޭނާ ބުންޏެވެ. "ބާރަ ވަނަ ދުވަހުގެ ރޭގެ ޝޯ އަށް ވެސް އެބަހުރި ޓިކެޓް ބުކްކޮށްފައި."
"މީ ލޯތްބަކީ" ގެ ޓިކެޓް ހޯދަން ބޭނުންވާ އެކަމަށް ހާއްސަކޮށްފައިވާ ދެ ހޮޓްލައިން ނަމްބަރު 7955243 އާއި 7845584 އަށް ގުޅައިގެން ޓިކެޓް ބުކް ކުރެވޭނެ އެވެ.
"މީ ލޯތްބަކީ" އަލީ ޝިފާއު (ޗިއްޕެ) ޑައިރެކްޓްކޮށްފައިވާ ފިލްމެކެވެ. މީގެ ސްކްރީންޕްލޭ ލިޔެފައި ވަނީ ޗިއްޕެ އާއި އައިޝަތު ފުއާދު ތައުފީގެވެ.
ބޮޑު ކާސްޓެއް ފެނިގެންދާ މި ފިލްމުގެ ލީޑް ރޯލް ކުޅެފައި ވަނީ ޖުމައްޔިލް ނިމާލާއި މަރިޔަމް އައްޒަ އެވެ.
މިދިޔަ މަހުގެ ފަހެއްގައި އޮލިމްޕަހުގައި އެޅުވި "މީ ލޯތްބަކީ" ގެ ވަދާއީ ތިން ޝޯގެ ޓިކެޓް ވެސް މިހާރު އަންނަނީ ވިއްކަމުންނެވެ.