އައްޑު އަށް ކޭބަލް ޓީވީގެ ހިދުމަތް ދޭ، މީޑިއާ ނެޓަށް އެކަށީގެންވާ ގޮތަށް ހިދުމަތް ނުދެވުނަސް ވަރިހަމަ އެވެ. ދެއިރު ދެ ދަޅަ އަށް ކަސްޓަމަރުންނަށް ޑިކޯޑަރު ބަދަލު ކުރަން ޖެއްސުމުން ހުރިހާ ކަމެއް ހަމަވީ އެވެ.
ބޯ މަތީގައި ރޯދަ މަސް އޮއްވައި އެ ކުންފުނިން އަނެއްކާ ވެސް މި ވަނީ ރައްޔިތުންނަަށް އިތުރު ތަކުލީފެއް ޖައްސައިފަ އެވެ. އިތުރު ހަރަދެއް ކުރަން "މަޖުބޫރުކޮށްފަ" އެވެ.
މީޑިއާ ނެޓްގެ ސަބްސިޑަރީ ކުންފުނި އައިލެންޑް ޓީވީން މިހާރު އަންނަނީ ކަސްޓަމަރުންނަށް ޑިކޯޑަރު ބަދަލު ކުރަން އަންގައި، އެކަން ކުރަމުންނެވެ.
ދެހާސް ފަނަރަ ވަނަ އަހަރުގެ ރޯދަ މަހާ ދިމާކޮށް އެޗްޑީ ޑިކޯޑަރަށް، ޑިކޯޑަރު ބަދަލުކޮށް ތިބި ކަސްޓަމަރުންނަށް އާ ޑިކޯޑަރު ލިބޭނީ ފައިސާ ދައްކައިގެންނެވެ. އެއީ 500ރ. އަށެވެ.
އެހެންވެ ކަޅު ކުލައިގެ ޑިކޯޑަރު ގެންގުޅޭ މީހުންނަށް ޑިކޯޑަރު ދޫކުރާނީ އެ އަގު ދެއްކީމަ އެވެ.
ހުދު ކުލައިގެ ޑިކޯޑަރު 2015 ވަނަ އަހަރު ނެގި މީހުންނަށް އަގަކާ ނުލައި، އާ ޑިކޯޑަރު ދޫކުރާނެ އެވެ.
ޑިކޯޑަރު ބަދަލު ކުރަންދާ އިރު، މިހާރު ބޭނުން ކުރަމުން އަންނަ ޑިކޯޑަރު ގެންދަން ޖެހޭނެ އެވެ.
މީޑިއާ ނެޓުން ބުނަނީ ވީހާ ވެސް އަވަހަށް އާ ޑިކޯޑަރަށް ކުރަން ހުރިހާ ކަސްޓަމަރުންނަށް އިލްތިމާސް ކުރާ ކަމަށެވެ.
އާ ޑެކޯޑަރު ދޫކުރަމުން އަންނަ އިރު، ޕެކެޖްތަކަށް ވެސް ވަނީ ބަދަލުތަކެއް ގެނެސްފަ އެވެ.
މިހާރު ޖުމްލަ ހަތަރު ޕެކެޖެއް ހިމެނެ އެވެ. އެއީ ލޯކަލް، ބޭސިކް، ފެމިިލީ އަދި ޕްރިމިއަމެވެ.
ދިހަ ޗެނަލް ހިމެނޭ ޕެކެޖްގެ އަގަކީ 150ރ. އެވެ. ޖުމްލަ 35 ޗެނަލް ހިމެނޭ ބޭސިކް ޕެކެޖްގެ އަގަކީ 250ރ. އެވެ.
މީގެ އިތުރުން 55 ޗެނަލް ހިމެނޭ ފެމިލީ ޕެކެޖް 320ރ. އަށް ލިބޭ އިރު، އަނެއް ތިން ޕެކެޖްގައި ހިމެނޭ ހުރިހާ ޗެނަލްތަކާއި އިތުރު އެޗްޑީ ޗެނަލްތަކާ އެކު ޕްރިމިއަމްގެ ޕެކެޖްގެ އަގަކީ 380ރ އެވެ. އެ ޕެކޭޖް ނަގާ ފަރާތްތަކަށް 68 ޗެނަލް ލިބޭނެއެވެ.