ބޮލީވުޑްގެ މަޝްހޫރު ބަތަލާ ޝިލްޕާ ޝެޓީ އާއި އޭނާގެ ފިރިމީހާ އަދި ވިޔަފާވެެރިޔާ ރާޖް ކުންދްރާ ވިޔަފާރިތަކަށް ހާއްސަކޮށްގެން ހިންގާ ޓީވީ ޗެނަލް ބިގް ޑީލުން ވިއްކި މުދަލަކަށްވާ ފައިސާ ވެެރި ފަރާތަކަށް ނުދައްކައި، މަކަރު ހެދި ކަމަށް ބުނެ އެ ދެ މީހުންގެ މައްސަލަ ފުލުހުންނަށް ހުށަހަޅައިފި އެވެ.
މި މައްސަލަ މުމްބާއީގެ ތާނޭ ޑިސްޓްރިކްޓްގެ ފުލުހުންނަށް ހުށަހެޅީ ޝިލްޕާމެންގެ ޓީވީ ޗެނަލް މެދުވެރިކޮށް މުދާ ވިއްކާ އާދައިގެ ވިޔަފާވެރިއެކެވެ.
އޭނާ ބުނި ގޮތުގައި ބިގް ޑީލް މެދުވެރިކޮށް ވިއްކާލި ބެޑްޝީޓްތަކަށް ލިބެން ޖެހޭ 24 ލައްކަ ރުޕީސް ނުދީ ވަނީ އޮޅުވާލައިފަ އެވެ.
އިންޑިއާގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި މި މައްސަލަ އެ ވިޔަފާވެރިޔާ ފުލުހުންނަށް ހުށަހެޅުމުން، ރާޖް ޕޮލިސް ސްޓޭޝަނަށް ހާޒިރުކޮށް ވަނީ ސުވާލުކޮށްފަ އެވެ.
އަދި ބަޔާން ނެގުމުގެ މަރުހަލާ އަދި ވެސް ކުރިއަށްދާ ކަމަށް ފުލުހުންނާ ހަވާލާދީ މީޑިއާތަކުން ބުނެފައިވެ އެވެ.
ދެހާސް ފަނަރަ ވަނަ އަހަރުގެ ތެރޭގައި ވެސް ޝިލްޕާ އާއި ފިރިމީހާގެ މަކަރާއި ހީލަތް ހެދުމުގެ މައްސަލައެއް ފުލުހުންނަށް ހުށަހަޅާފައިވެ އެވެ.
އެ ފަހަރު މައްސަލަ ހުށަހެޅި އެ މީހުންގެ އެސެންޝަލް ސްޕޯޓްސް އެންޑް މީޑިއާ ޕްރައިވެޓް ލިމިޓެޑުން ދެ އަހަރުގެ ތެރޭގައި އަނބުރާ ދައްކާ ގޮތަށް ނެގި ފައިސާތަކެއް އަނބުރާ ދައްކައިފައި ނުވާ ކަމަށް ބުނެ އެވެ.