ފިތުރު ޒަކާތާއި މުދަލުގެ ޒަކާތް ލިބި ގަތުމަށް ފަގީރުންގެ ގޮތުގައި ރަޖިސްޓްރީވުމުގެ ކަންކަން އިސްލާމިކް މިނިސްޓްރީން ކުރިއަށް ގެންދާ އިރު އެކަމުގައި އައްޑޫ ސިޓީ ކައުންސިލް ބައިވެރި ނުކުރާ ކަމަށާއި އެހެން ނަމަވެސް ފޯމް ފުރުމުގައި ދަތިތަކެއް ދިމާވާތީ ކައުންސިލުން ކަންބޮޑުވުން ފާޅުކޮށްފި އެވެ.
ކައުންސިލުން މިއަދު ނެރުނު ބަޔާނެއްގައި ބުނީ މިދިޔަ އަހަރުގެ ރަމަޟާން މަހު ވެސް މި މައްސަލަ ކުރިމަތިވުމާ އެކު ފިތުރު ޒަކާތް ލިބިގަތުމުގައި އައްޑޫގެ ރައްޔިތުންނަށް ދެރަ ގޮތްތަކާއި ކުރިމަތިލާން ޖެހިފައިވާ ކަމަށެވެ.
"ފަރުޟު ޒަކާތް ނެރުމާއި ޒަކާތުން ބައި ލިބިގަތުމާއި އައްޑޫ ސިޓީގެ މިސްކިތްތައް ބެލެހެއްޓުމާއި ޤަބުރުސްތާނު ބެލެހެއްޓުމާއި ކަށުކަމާކެމީގެ ކަންކަމުގައި އައްޑޫ ސިޓީގެ ރައްޔިތުންނަށް ވަރަށް ބޮޑެތި ދަތިތަކާ ކުރިމަތިލާން މެދުވެރިވަމުންދާތީ މިކަންކަމަށް ރައްޔިތުންނަށް ފަސޭހަ ހޯދައި ދިނުމުގެ ގޮތުން އައްޑޫ ސިޓީގައި މިނިސްޓްރީ އޮފް އިސްލާމިކް އެފެއާޒްގެ މަސައްކަތް ހިންގުމުގައި އައްޑޫ ސިޓީ ކައުންސިލުން މިނސްޓްރީ އަށް ބޭނުންވާ އެހީތެރިކަމަކީ ކޮބައިކަން ދެނެގަތުމަށް މި އަހަރުގެ މިހާތަނަށް ކައުންސިލުން އިސްނަންގަވައި ދެ ފަހަރު އިސްލާމިކް މިނިސްޓްރީއާ ބައްދަލުކުރުމަށް މާލެއަށް ދަތުރުކުރެވިފައި ވެއެވެ." ބަޔާނުގައިވެ އެވެ.
އެހެން ނަމަވެސް މިއިން އެއްވެސް ބައްދަލުވުމެއްގައި މިނިސްޓްރޫން ކައުންސިލާ ބައްދަލުކޮށްފައި ނުވާ ކަމަށް ކައުންސިލުން ބުންޏެވެ.
"މިނިސްޓްރީ އޮފް އިސްލާމިކް އެފެއާޒްގެ މަސައްކަތް އައްޑޫސިޓީގައި ހިންގުމަށް ފަސޭހަކޮށް ދިނުމުގެ ގޮތުން އައްޑޫ ސިޓީ ކައުންސިލް އިދާރާގައި އެ މިނިސްޓްރީގެ އޮފީހެއް ހިންގުމަށް ވަރަށް ދީލަތި ގޮތެއްގައި ޖާގަ ތަނަވަސްކޮށް ދެވިފައިވެ އެވެ." ބަޔާނުގައިވެ އެވެ.
ކައުންސިލުން އަދި ބުނީ ޒަކާތް ނެރުމާއި ޒަކާތުން ބައި ލިބިގަތުމާއި އައްޑޫގެ މިސްކިތްތައް ބެލެހެއްޓުމާއި ޤަބުރުސްތާނު ބެލެހެއްޓުމާއި ކަށުކަމާކެމީގެ ކަންކަމުގައި ރައްޔިތުންނަށް ވަރަށްބޮޑެތި ދަތިތަކާ ކުރިމަތިލާން މެދުވެރިވަމުންދާތީ އެކަންކަމުގައި ރައްޔިތުންނަށް ކުރިމަތިވަމުންދާ ދަތިތަކަށް އަވަސް އަދި ފަސޭހަ ހައްލެއް ހޯދައި ދޭން މިނިސްޓްރީ އަށް އިލްތިމާސް ކުރާ ކަމަށެވެ.