ބައްޕަ އާއި ދަރިފުޅު އެއް ޖާޒީއެއްގައި، އެއް ޓީމަކަށް ކުޅޭ ތަން ބެލުމަކީ ހަމަ ޔަގީނުން ވެސް ވަރަށް ޝައުގުވެރި ކަމަކަށް ވާނެ އެވެ. މިއީ އާންމުކޮށް ފުޓްބޯޅަ ދަނޑުމަތިން ފެންނާނެ މަންޒަރެއް ވެސް ނޫނެވެ.
އައްޑޫގައި މިހާރު ކުރިއަށްދާ މިނިވަން ޗެމްޕިއަންޝިޕް ފުޓްބޯޅަ މުބާރާތުގައި ވާދަ ކުރާ ފޭދޫ ޓީމަށް ބަލާ އިރު، ބައްޕަ އާއި ދަރިފުޅުގެ ހުނަރު މި ޓީމުން މިހާރު އަންނަނީ ދައްކާލަމުންމެވެ.
މިއީ ފޭދޫ އަހުމަދު ސައީދު (އައްމަޓީ) އާއި އޭނާގެ ހަމައެކަނި ދަރިފުޅު ސަޔަމް ސައީދުގެ ވާހަކަ އެވެ. މި ދެބަފައިން އެކުގައި ފޭދު ޓީމަށް ކުޅޭ އިރު، ޓީމް މިހާރު އޮތީ ފައިނަލަށް ވެސް ދަތުރުކޮށްފަ އެވެ.
މަތީީގައި އެހެރެ ފޮޓޯ އަށް ބަލައިލާށެވެ. ފަހަތުގެ ސަފުގެ ކަނާތް ފަރާތުގައި އެ ހުރީ އައްމަޓީ އެވެ. ކުރީ ސަފުގެ ވާތް ފަރާތުން އެހެރީ އޭނާގެ ދަރުފުޅު ސަޔަމް އެވެ.
ބައްޕަގެ އިރުޝާދާއި އެއްގޮތަށް މަސައްކަތް ކޮށްގެން، ސަޔަމް ދަނޑު މައްޗަށް ނިކުތުމަކީ އެއްގޮތަކަށް ވެސް ހައިރާންވާންވީ ކަމެއް ނޫނެވެ. އޭނާގެ ބައްޕަގެ އިތުރުން މުޅި އާއިލާއަކީ ވެސް ވަރަށް ފުޓްބޯޅަ އާއިލާއެކެވެ. އޭގެ ތެރޭގައި ނަން މަޝްހޫރު ހުނަރުވެރިން މަދެއް ނޫނެވެ.
ސަޔަމްގެ ލެއާ ފުޓްބޯޅަ ވަނީ ވަރަށް ބޮޑަށް ގުޅިފަ އެވެ. އެންމެ ކުޑައިރުއްސުރެ ވެސް އޭނާ އަށް އުޅެން ޖެހިފައި އޮތީ ކުޅިވަރު، ވަކިން ހާއްސަކޮށް ފުޓްބޯޅަށް ހުސްވެފައިވާ އާއިލާއަކާ އެކުގައެވެ.
މި އާއިލާގެ ތެރޭގައި ތިބި ނަން މަޝްހޫރު މީހުންނަށް ބަލާ އިރު، 1970 ގެ އަހަރުތަކުގައި ވިދާލި ފޭދޫ ޑީއެންސީ ޓީމްގެ ޖޯޖާއި އޭނާގެ ދަރިން ކަމަށްމާ ޓީސީގެ މިހާރުގެ ކޯޗް މުހައްމަދު ނިޒާމް (ނިޒާމްބެ) އާއި އޮލިމްޕިކް ކޮމިޓީގެ ޖެނެރަލް ސެކްރެޓަރީ އަހުމަދު މަރްޒޫގް (މަރޭ) ފާހަގަކޮށްލެވެއެވެ.
ސަޔަމްގެ ބައްޕަ އައްމަޓީއަކީ ރާއްޖޭގެ މަޝްހޫރު ބައެއް ކުލަބްތަކަށާއި ގައުމީ ޓީމަށް ވެސް ކުޅެފައިވާ ހުނަރުވެރި ކުޅުންތެރިއެކެވެ. ދެހާސް އަށް ވަނަ ސާފް ޗެމްޕިއަންޝިޕް ކާމިޔާބު ކުރި ޓީމްގައި ވެސް އައްމަޓީ ހިމެނުނެވެ.
މީގެ އިތުރުން އައްމަޓީގެ ބޭބެ މުހައްމަދު ސައީދު (ސަޑޭ) އަކީ ފެށުނީއްސުރެ އައްޑޫގެ ފުޓްބޯޅައިގެ ތެރޭގައި ހާއްސަކޮށް ފޭދޫގައި ފުޓްބޯޅަ ކުޅުންތެރިން އުފެއްދުމުގައި އެންމެ ކުރީ ސަފުގައި މަސައްކަތް ކުރައްވާ ކޯޗެކެވެ.
މި ހިސާބަކުން އަދި ސަޔަމްގެ ފުޓްބޯޅަ އާއިލާގެ ވާހަކަ ނިމުނީއެއް ނޫނެވެ. އޭނާގެ ބޮޑުދައިތަގެ ފިރިމީހާ، އަލީ ސަރީރް (ޕީޓާ) އަކީ ވެސް ރާއްޖޭގެ މަޝްހޫރު ބައެއް ކުލަބްތަކަށް ކުޅެފައިވާ ކުޅުންތެރިއެކެވެ.
ސަޔަމްގެ ބޮޑުބޭބެ، ޓީސީގެ ކޯޗް ނިޒާމްގެ ވަނީ އައްމަޓީގެ ދެބަފައިން އެއް ޓީމަކަށް ކުޅޭތީ އެކަމާއި މެދު ފަޚުރުވެރިވާކަން ފާހަގަކޮށްފައެވެ.
"ތި ދެ މީހުންނާ މެދު އަހަރެން ފަހުރުވެރިވަން،" ނިޒާމް ބުނެފައިވެ އެވެ.
ނިޒާމްބެ ބުނީ އައްމަޓީގެ ފިޔަވަޅު މަތިންނާއި އޭނާގެ ތަޖުރިބާގެ އަލީގައި ސަޔަމް ކުރިއަށްދާ ނަމަ، އޭނާއަކީ ކޮންމެވެސް ދުވަހަކުން، ވަރުގަދަ ކުޅުންތެރިއަކަށް ވާނެ ކަމަށެވެ.
ދެހާސް ފަނަރަ ވަނަ އަހަރު ބޭއްވި މިނިވަން 50 ޗެމްޕިއަންޝިޕް މުބާރާތުގެ ޗެމްޕިއަންކަން ހޯދި ޓީމަކީ ވެސް ފޭދު އެވެ. ހަމައެއާ އެކު އެ ޓީމް ވަނީ ފާއިތުވި ދެ އަހަރު ޒޯން އަށެއްގެ ޗެމްޕިއަންކަން ހޯދީ ވެސް ފޭދޫ ޓީމުންނެވެ.
މިދިޔަ އަހަރުގެ ކާމިޔާބީ ތަކުރާރު ކުރަން ފޭދޫ ޓީމް ނިކުމެފައިވާ އިރު، މި ޓީމުން އައްމަޓީ އާއި ދަރިފުޅު ސަޔަމްގެ ހުނަރު އިތުރަށް ފެންނާނެ ކަމަށް އުންމީދު ކުރަމާ ހިނގާށެވެ.