ނުރައްކާތެރި އެބޯލާ ވައިރަސް އަނެއްކާވެސް ފެންނަން ފަށައިފި ކަމަށް ދުނިޔޭގެ ސިއްހަތާއި ބެހޭ އިދާރާއިން ހާމަކޮށްފިއެވެ.
ނިމިގެންދިޔަ އެޕްރިލް މަހުގެ 22 ވަނަ ދުވަހުން ފެށިގެން 9 މީހަކު އެބޯލާއަށް ޝައްކުކުރެވިފައިވެއެވެ. އަދި ތިން މީހަކު ވަނީ އެބޯލާއަށް ޕޮސިޓިވްވެ މަރުވެފައެވެ. ކޮންގޯގެ ބަޔޯ މެޑިކަލް ރިސާޗް ސެންޓަރުން ޓެސްޓުކުރިއިރު 5 ސާމްޕަލްގެ ތެރެއިން އެއް ސާމްޕަލް ވަނީ އެބޯލާއަށް ޕޮސިޓިވްވެފައެވެ.
އެބޯލާ ފެނިފައިވަނީ އެގައުމުގެ ލިކަޓީ ޑިސްޓްރިކްޓުންނެވެ. ޑަބްލިއު އެޗް އޯގެ އޮފިޝަލުން މިހާރު އެސަރަހައްދަށް ވަނީ އިތުރު ޓެސްޓުތައް ހެދުމަށް ގޮސްފައެވެ.
މިއީ ނުރައްކާތެރި ވައިރަސް އާންމުވާންފެށި 8 ވަނަ ފަހަރެވެ. އެންމެ ފުރަތަމަ އެބޯލާ ވައިރަސް ފެނިފައިވަނީ 1976 ވަނަ އަހަރުގައެވެ. 2014 ވަނަ އަހަރު ވަނީ މި ވައިރަސް ދުނިޔޭގެ އެކި ސަރަހައްދުތަކަށް ވަރަށް ބޮޑަށް ފެތުރިފައެވެ.