ކައުންސިލްތަކަށް ކޯޑިނޭޓަރުން އައްޔަން ކުރުމާއި ބެހޭގޮތުން ޕީޕީއެމްގެ މަޖިލިސް މެންބަރުން މިއަދު މަޝްވަރާ ކުރުމަށް ހަމަޖެހިފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
'އައްޑޫލައިވް' އާއި ވާހަކަ ދައްކަވަމުން ޕީޕީއެމްގެ މަޖިލިސް މެންބަރަކު ވިދާޅުވީ، ކައުންސިލްތަކަށް ކޯޑިނޭޓަރުން އައްޔަން ކުރުމާއި ބެހޭގޮތުން ނުރަސްމީ މަޝްވަރާތަކެއް ކުރެވިފައިވާ" ކަމަށެވެ.
މިއަދު މެންދުރުފަހު 1:00 ޖަހާއިރު މުލިއާގޭގައި ޕީޕީއެމްގެ ޕީޖީ ގުރޫޕްގެ ބައްދަލުވުމެއް ބޭއްވުމަށް ހަމަޖެހިފައިވާއިރު ކައުންސިލްތަކަށް ކޯޑިނޭޓަރުން އައްޔަން ކުރުމާއި ބެހޭގޮތުން ވެސް މަޝްވަރާކުރާނެ ކަމަށް އޭނާ ވިދާޅުވިއެވެ.
އެހެން މީޑިޔާއަކަށް ދިން އިންޓަވިއުއެއްގައި ރައީސް އޮފީހުގެ ތަރުޖަމާން އިބްރާހީމް މުއާޒު އަލީ ވިދާޅުވީ ސަރުކާރުގެ އެކިއެކި މަގާމުތަކަށް ބޭފުޅުން އައްޔަންކޮށް ވަކިކުރުމަކީ ރައީސުލްޖުމުހޫރިއްޔާއަށް ލިބިދޭ ބާރެއް ކަމަށެވެ. އެހެން ނަމަވެސް ކައުންސިލްތަކަށް ސަރުކާރުގެ ފަރާތުން ކޯޑިނޭޓަރުން އައްޔަންކުރަން އުޅޭކަމަށް ދެކެވޭ ވާހަކަތައް ދޮގުކުރައްވާފައެއް ނުވެ އެވެ.
ކައުންސިލްތަކަށް ސަރުކާރު ތަމްސީލުކުރާ ކޯޑިނޭޓަރުން އައްޔަންކުރާނެ ކަމަށް ބުނެ ސޯޝަލްމީޑިޔާގައި ބައެއް ފަރާތްތަކުން ވާހަކަ ދައްކަމުން ގެންދާއިރު، ސަރުކާރަށް އެއްބާރުލުން ނުދޭ ކައުންސިލްތަކާއި މެދު ފިޔަވަޅު އަޅާނެ ކަމުގެ އިޝާރާތެއް ރައީސް އޮފީހުގެ މިނިސްޓަރ އަހްމަދު ޒުހޫރު ވެސް ވަނީ ދެއްވާފައެވެ.
ޒުހޫރު ވިދާޅުވީ ސަރުކާރުގެ ތަރައްގީގެ މަޝްރޫއުތަކަށް އެއްބާރުލުން ނުދޭނަމަ އެކައުންސިލްތަކާއި މެދު ފިޔަވަޅު އަޅާފައި ނުވަތަ އެއީ "އޮންނަން ނުޖެހޭ ކައުންސިލްތަކެއް ކަމަށް ކަނޑައަޅާފައި ވެސް" ތަރައްޤީ ގެންނާނެ ކަމަށެވެ.
ޤާނޫނީ ގޮތުން ބަލާއިރު ކައުންސިލްތަކަށް ކޯޑިނޭޓަރުން އައްޔަން ކުރުމަށް ރައީސުލްޖުމްހޫރިއްޔާއަށް އެއްވެސް ހުރަހެއް ނެތް އިރު އެމަނިކުފާނުގެ ސަރުކާރުގައި 90 އަށް ވުރެ ގިނަ ކޯޑިނޭޓަރުން އެބަތިއްބެވެ.