ހުރިހާ ފިރެހެނުންގެ ކައިރީގައި ބުނެލަން އޮތް ވާހަކައެއް އެބަ އޮތެވެ. މި ވާހަކަ ބުނަން ބޭނުން ވަނީ ސައިންޓިސްޓުންގެ ޓީމަކާ ހަވާލާދީ އެވެ.
އެ މީހުން ބުނަނީ ފިރިހެނުން ރޭގަނޑު އަވަހަށް ނިދާށޭ އެވެ.
އެހެން ގޮތަކަށް ބުނާ ނަމަ، ރޭގަނޑު އަވަހަށް އެނދަށް އަރާށޭ އެވެ. ހާއްސަކޮށް އަލަށް ކައިވެނިކޮށް، ދަރިއަކުން ހޯދަން ޕްލޭން ކުރަމުން އަންނަ ފިރިހެނުންނަށް މި ވާހަކައިގެ މުހިިއްމުކަން ބޮޑެވެ.
ޗައިނާގެ ހާބިން މެޑިކަލް ޔުނިވަސިޓީން ހެދި ދިރާސާ އިން ދައްކާ ގޮތުގައި ފިރިހެނުން ރޭގަނޑު އަވަހަށް ނިދުމަކީ އެ މީހުންގެ ދަރިފަނި އާލާވުމާއި ދުޅަހެޔޮ ދަރިފަނި އާލާވުމަށް ބާރު އަޅައިދޭ ކަމެކެވެ.
ދިރާސާ އިން ދައްކާ ގޮތުގައި ރޭގަނޑު 8:00-10:00 އާ ދޭތެރޭ ނިދާ ފިރިހެނުންގެ ދަރިފަނީގެ ކޮލިޓީ މާ ބޮޑަށް ވެސް ރަނގަޅުވެ އެވެ.
އެހެންވެ ފިރިހެނުން ރޭގަނޑުގެ ނިދި މަދުވެގެން އަށް ގަޑި އިރަށް ފުރިހަމަ ކުރަން ޖެހެ އެވެ.
ފިރިހެނުން ރޭގަނޑު ނިދަން ނޫޅެ، އެހެން ކަންކަމުގައި ރޭގަނޑު ވަގުތުތައް ހޭދަ ކުރާ ނަމަ، ފެމިލީ ޕްލޭނަށް ނޭދެވޭ އަސަރު ކުރުން ގާތެވެ.
އެފަދަ މީހުންގެ ދަރިފަނި ބަލިކަށި ކަމަށާއި އަނބިމީހާގެ ބަނޑުގައި ދަރިއާލާވުމަށް އެފަދަ ފިރިހެނުންގެ ދަރިފަނި ނުކުޅެދޭ ކަމަށް ވެސް ދިރާސާ އިން ވަނީ ދައްކައިފަ އެވެ.