ކަންގަނާ ރަނާވަތުގެ ފިލްމްތަކަށް ލޯބި ކުރާ މީހުންނަށް އޭނާގެ ކުރިއަށް އޮފް ފިލްމް ވަަރަށް ހާއްސަ ވާނެ އެވެ. މި ފިލްމަކީ ހެންސަލް މެހެތާ ޑައިރެކްޓްކޮށްފައިވާ "ސިމްރަން" އެވެ.
ޕްރަފުލް ޕަޓޭލް ކިޔާ އެމެރިކާގައި ދިރިއުޅޭ ޒުވާން ހައުސްކީޕަރެއްގެ ދިރިއުޅުން ތަފާތު ގޮތަކަށް ބަދަލުވެގެންދާ ގޮތް ކިޔައިދޭ މި ފިލްމުގެ ފުރަތަމަ ޓީޒާ ވެސް މިހާރު ވަނީ ދައްކާލައިފަ އެވެ.
އެއް މިނިޓްގެ ޓީޒާ އިން ފެންނަނީ ކަންގަނާގެ މަޖާ ހަރަކާތްތަކެކެވެ.
ގިނަ ބަޔަކު ގަބޫލް ކުރާ ގޮތުގައި "ސިމްރަން" ވެގެން ދާނީ ކަންގަނާ އެންމެ މޮޅު ބަތަލާގެ ނެޝަނަލް އެވޯޑް ހޯދި ދެ ފިލްމް ކަމަށްވާ "ކްއީން" އާއި "ތަނޫ ވެޑްސް މަނޫ ރިޓާންސް" ފަދައިން އޭނާގެ ވަރަށް މޮޅު އެކްޓިންއެއް ފެނިގެން ދާނެ ފިލްމަކަށެވެ.
އެހެންވެ ފިލްމަށް މިހާރު ވެސް ވަރަށް ގިނަ ބަޔަކު އަންނަނީ އިންތިޒާރު ކުރަމުންނެވެ. ހެންސަލް ވެސް ބުނެފައިވާ ގޮތުގައި "ސިމްރަން" އަކީ ކަންގަނާގެ އެކްޓިން ހުނަރު ވަރަށް ބޮޑަށް ދައްކުވައި ދޭނެ ފިލްމެކެވެ.
އެހެންވެ އޭނާ ހުރީ ފިލްމާ ދޭތެރޭ ވަރަށް ބޮޑަށް ހިތްހަމަޖެހިފަ އެވެ.
އަޕޫރްވާ އާސްރާނީގެ ސްކްރީންޕްލޭއަކަށް ހަދާފައިވާ "ސިމްރަން" ސިނަމާތަކަށް އަންނަނީ ސެޕްޓެމްބަރު މަހުގެ 15 ގަ އެވެ.
މިއީ މި އަހަރުގެ ކުރީކޮޅު ރިލީޒް ކުރި ފްލޮޕް ފިލްމް "ރަންގޫން" އަށް ފަހު، ރިލީޒްވާ ކަންގަނާގެ ފުރަތަމަ ފިލްމެވެ.