ރިއަލް އެސްޓޭޓްގެ ވިޔަފާރީގެ ތެރޭގައި ވެސް މިހާރު އުޅޭ ބޮލީވުޑްގެ އެކްޓަރު ވިވެކް އޮބެރޯއީ އިންޑިއާގެ ޝަހީދުވެފައިވާ ސިފައިންގެ މީހަކަށް 25 ފްލެޓް ހަދިޔާކޮށްފި އެވެ.
އޭނާ ފްލެޓްތައް ހަދިޔާ ކުރި ސިފައިންގެ ތެރޭގައި ޝަހީދުވި ސިފައިންގެ ތިން މީހެއްގެ އާއިލާއަކަށް މިހާރު ވަނީ ފްލެޓް ހަވާލުކޮށްފަ އެވެ.
އެ މީހުންނާ އެ ފްލެޓްތައް މިދިޔަ މާޗް މަހުގެ ތެރޭގައި ހަވާލުކޮށްފައިވާ ކަމަށް ސެންޓްރަލް ރިޒާވް ޕޮލިސް ފޯސް (ސީއާރްޕީއެފް) އިން ބުންޏެވެ.
ސީއާރްޕީއެފްގެ އިސް އޮފިޝަލަލު ވިދާޅުވީ ވިވެކް ހަދިޔާ ކުރި ފްލެޓްތަކުގެ ތެރެއިން، އަދި ޝަހީދުވެފައިވާ ސިފައިންގެ އާއިލާތަކާ ރަސްމީކޮށް ހަވާލު ކުރެވިފައި ނުވާ ފްލެޓްތައް ވެސް ވަރަށް އަވަހަށް ހަވާލު ކުރާނެ ކަމަށެވެ.
އަދި އެ ފްލެޓްތައް ލިބޭ މީހުންގެ ނަންތައް އިއުލާން ކުރާނެ ކަމަށް ވެސް ވިދާޅުވި އެވެ.
"މަސްތީ" އާއި ސާތިޔާ" ފަދަ ފިލްމްތައް ކުޅެފައިވާ ވިވެކް ސިފައިންނަށް ހަދިޔާ ކުރި ފްލެޓްތަކަކީ މުމްބާއީގެ ތާނޭ ޑިސްޓްރިކްޓް ހަދާފައިވާ ފްލެޓްތަކެވެ.
އޭނާގެ އިތުރުން މަޝްހޫރު އެކްޓަރު އަކްޝޭ ކުމާރަކީ ވެސް ސިފައިންނާއި ސިފައިންގެ އާއިލާތަކަށް ތަފާތު އެހީތައް ފޯރުކޮށް ދެމުން އަންނަ އެކްޓަރެކެވެ.