ކައުންސިލްތަކިގެ މެޖޯރިޓީ އެމްޑީޕީގެ ކައުންސިލަރުންނަށް ލިބުނު ނަމަވެސް ސަރުކާރުން ބޭނުންވާ އިޖްތިމާއީ އަދި އިގްތިސާދީ ތަރައްގީ އަށް ހުރަސް ނޭޅުއްވުމަށާއި، ރައްޔިތުން ބޭނުންވާ ތަރައްގީ ސަރުކާރުން ގެންނާނެ ކަމަށް ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
ސަރުކާރު ކޯލިޝަނުން ބޭއްވި ޖަލްސާގައި ރައީސް ވިދާޅުވީ އިދިކޮޅު ކައުންސިލަރުން ތަރައްގީ ގެންނަން އެހީތެރިކަން ނުދިން ނަމަވެސް އެކަން ކުރާނެ ކަމަށެވެ.
"އެމްޑިޕީ މެޖޯރިޓީ ރާއްޖޭގެ އެކި ހިސާބުތަކުގެ ބައެއް ކައުންސިލްތަކަށް ލިބުނު ކަމުގައިވީ ނަމަވެސް ތަރައްގީ އަށް ހުރަސްއަޅުއްވަން ނޫޅުއްވާތި،" ރައީސް ވިދާޅުވި އެވެ. "އަޅުގަނޑުމެން އެ ބޭފުޅުން އެހީ ވިޔަސް، އެހީ ނުވިޔަސް ރާއްޖޭގެ އެކި ހިސާބުތަކަށް ގެންދާ ތަރައްގީ އަޅުގަނޑުމެން ގެންނާނަން."
ރައީސް ޔާމީން އަދި ވިދާޅުވީ މީގެ ކުރިން ވެސް އެމްޑީޕީ މެޖޯރިޓީ ލިބޭ ކައުންސިލްތަކުން ސަރުކާރުގެ ތަރައްގީގެ މަޝްރޫއުތަކަށް ދަތިކޮށްފައިވާ ކަމަށެވެ.
އެގޮތުން ޒުވާނުންނަށް ފުޓްސަލް ދަނޑު ހަދަން ބިން ކަނޑައި ދޭން ބުނެ ބިން އެކަން ނުކޮށްދީ އެތައް މަހެއް ކޮށްފައި ހުރި ކަމަށް ވިދާޅުވި އެވެ.
އެހެން ނަމަވެސް ދިވެހި ދައުލަތުގެ ސިޔާދަތު ފުރިހަމަ އަށް ރާއްޖޭގެ ހުރިހާ މީހުންގެ މައްޗަށާއި، ރާއްޖޭގެ ކޮންމެ އަކަފޫޓެއްގެ މައްޗަށް ހިނގާނެތީ އެކަން ވެސް ހުންނާނީ ކޮށްފައި ކަމަށް ރައީސް ވިދާޅުވި އެވެ.