މިހާރު ވެސް އެތަކެއް ބްރޭންޑެއް އިޝްތިހާރު ކުރަމުން އަންނަ ބޮލީވުޑްގެ ޒުވާން ތަރި ރަންވީރް ސިންގްގެ ފޮޓޯ ޖެހި ޑިއޮޑަރަންޓް ފުޅި ވަރަށް އަވަހަށް ބާޒާރަށް ނެރެން ހަމަޖައްސައިފި އެވެ.
އެކަން ރަންވީރު ވެސް ވަނީ ޓްވިޓާ މެދުވެރިކޮށް ފޭނުންނާ ހިއްސާކޮށްފަ އެވެ. "ރާމް ލީލާ" އާއި "ބަޖިރާއޯ މަސްތާނީ" ފަދަ ފިލްމްތައް ކުޅެފައިވާ އެކްޓަރު ބުނީ އަލަށް ނިކުންނަ ޑިއޮޑަރަންޓް ފުޅީގައި އޭނާގެ ފޮޓޯ ހުންނާނެ ކަމަށާއި ވަރަށް އަވަހަށް ބާޒާރަށް އަންނާނެ ކަމަށެވެ.
އެހެން ނަމަވެސް އެއީ ކޮން ބްރޭންޑެއްގެ ޑިއޯއެއް ކަމަށް ބުނެފައެއް ނުވެ އެވެ.
ބޮލީވުޑްގެ ބައެއް ރިޕޯޓްތައް ބުނާ ގޮތުގައި އެއީ ރަންވީރުގެ އަމިއްލަ ލޭބަލަކަށްވުން ވަރަށް ގާތެވެ.
އޭނާއަކީ އިންޑިއާގެ ޒުވާން އެކްޓަރުންގެ ތެރެއިން މިހާރު އެންމެ ޑިމާންޑް ބޮޑު އެއް އެކްޓަރެވެ. އަނެއްކޮޅުން މަޝްހޫރު ވަރަށް ގިނަ ބްރޭންޑްތައް ރަންވީރު މިހާރު ވެސް އިޝްތިހާރުކޮށްގެން ބޮޑު އާމްދަނީއެއް ހޯދަ އެވެ.
އޭގެ ތެރޭގައި ހެޑް އެންޑް ޝުޑާ ޝެމްޕޫ، ފިޒީ ޑްރިންސްކް ތަމްބްސް އަޕް، ވިވޯ މޮބައިލްސް އަދި ޖެކް އެންޑް ޖޯންސްގެ އުފެއްދުންތައް ހިމެނެ އެވެ.
މިދިޔަ އަހަރު ރިލީޒްވި "ބޭފިކްރޭ" އިން ފެނިގެން ދިޔަ ރަންވީރު ދެން އެންމެ އަވަހަށް ފެނިގެން ދާނެ ފިލްމަކީ ސަންޖޭ ލީލާގެ ބަންސާލީގެ ތާރީހީ ފިލްމް "ޕަދްމަވަތީ" އެވެ.
އެ ފިލްމް ސިނަމާތަކަށް އަންނާނީ މި އަހަރުގެ ނޮވެމްބަރު މަހުގެ 17 ގަ އެވެ.