މި ދުވަސްކޮޅަކީ ދަރިވަރުން ބޮޑު އިމްތިހާނަކާއި ކުރިމަތިލާ ދުވަސްވަރެކެވެ. އެތައް ދުވަހެއްގެ ނިދި ނަގާލައި ދަސްކުރި އެއްޗަކާއިގެން އިމްތިހާން ހޯލުގައި ގިނަ ވަގުތު ހޭދަކުރާ ދުވަސްކޮޅެކެވެ.
އިމްތިހާނަށް މީހާ ތައްޔާރުވާއިރު ކެއުމަކީ ހާއްސަ ސަމާލުކަން ދޭން ޖެހޭ އެއްކަމެވެ. އެހެނީ މީހާގެ ހަށިގަނޑުގައި ހަކަތަ ނެތި މީހާ ބަނޑުހައިވެފައި ހުރެގެން ހެދޭނެ އިމްތިހާނެއް ނުވަތަ ފަރިތަ ކުރެވޭނެ ފިލާވަޅެއް ނޯންނާނެތީއެވެ.
ވުމާއެކު މިކަމަކީ ބެލެނިވެރިންނާއި ދަރިވަރުން ހާއްސަ ސަމާލުކަމެއް ދޭން ޖެހޭ މުހިއްމު ކަމެކެވެ. ތިރީގައި މިވާ ކާނާތައް ކެއުމުގައި ހިމެނޭތޯ ވީހާވެސް ވަރަކުން ބަލާށެވެ.
1. އޮމެގާ-3 އެކުލެވިގެންވާ ކަނޑުމަސް
ސޭމަން، ސާޑައިން އަދި މެކަރެލް އަކީ އެންމެ ދުޅަހެޔޮ ބާވަތްތަކުގެ ކަނޑުމަހެވެ. އެއީ އޭގައި ގިނަ އަދަދަކަށް ޕްރޮޓީން އާއި އޮމެގާ 3 އެކުލެވިގެންވުމުން، ސިކުނޑި މަސައްކަތްކުރާ މިންވަރު އިތުރަށް ރަނގަޅުވެގެން ދާތީއެވެ. މީގެ އިތުރުން ރެހި އަކީވެސް ކެއުން ރަނގަޅު މަހެކެވެ.
އެހެންނަމަވެސް، އެންމެ ފަސޭހައިން ދިވެހި ކިޔަވާ ކުދިންނަށް ލިބެން ހުންނާނީ ކަންނެލި މަސްދަޅެވެ. އޭގެ ތެރެއިން އެންމެ ރަނގަޅީ ފެން މަސްދަޅެވެ.
އޭގެ ކުޑަ މަސްކޮޅަކާއި އެކު ޕާން ޓޯސްޓް ކޮށްގެން ކެއުމަކީ އެހާ އަގުބޮޑު ނޫން، ފަސޭހަ ކެއުމެކެވެ. ޕާން ގަންނައިރު ހޯލްވީޓް ޕާން ނުވަތަ ބްރައުން ބްރެޑް ގަންނާށެވެ. އޭގެއިން ކާބޯހައިޑްރޭޓްސް އާއި ޕްރޮޓީންސް އާއި ވިޓަމިންސް ލިބޭނެއެވެ.
2. ބިސް
ފެނުކައްކައިގެން ނުވަތަ ބިސްގަނޑު އަޅައިގެންވެސް ބިސް ކެވިދާނެ އެވެ. ބިހަކީ ސިކުނޑިއަށް އެންމެ ދުޅަހެޔޮ އަދި އެންމެ ރަނގަޅު ކާނާގެ އެއް ބާވަތެވެ. ހެނދުނު ނާސްތާ ކުރާއިރު ބިސް ކެއުމަކީ ވަރަށް ރަނގަޅު ކަމެކެވެ. އެއް ބިހުގައި 6ގ ޕްރޮޓީން އަދި ވިޓަމިން ބީ12 ހިމެނެއެވެ.
- ފެހިކުލަ ގަދަ ތަރުކާރީ
ސްޕިނެޗް އާއި ބްރޮކޮލީ އަކީ ޓެސްޓަށް ތައްޔާރުވަމުން އަންނައިރު ވިޓަމިންސް ހޯދުމަށްޓަކައި ކެއުން އެންމެ ރަނގަޅު ތަރުކާރީތަކުގެ ތެރޭގައި ހިމެނޭ ދެ ބާވަތެކެވެ. އެގޮތުން ފެހިކަން ގަދަ ތަރުކާރީގައި ސިކުނޑިއަށް ފައިދާހުރި ވިޓަމިން ކޭ އާއި، ވިޓަމިން ބީ6 އަދި ވިޓަމިން ބީ12 ހިމެނެއެވެ. ވިޓަމިން ބީ6 އަދި ބީ12 އަކީ ކުއްޖާގެ ސިކުނޑި ހޭލައްވައި، ހަނދާން ގަދަކޮށްދޭ މާއްދާތަކެކެވެ.
4. ޕީނަޓް ބަޓާ
ގިނަ މީހުން ހީކުރާ ގޮތުގައި ޕީނަޓް ބަޓާ އަކީ ފައިދާހުރި ކާއެއްޗެއް ނޫނެވެ. އެހެންނަމަވެސް ހަޤީގަތުގައި އެއީ ދުޅަހެޔޮ ފެޓްސް އާއި ގިނަ އަދަދަކަށް ޕްރޮޓީން އެކުލެވިގެންވާ އެއްޗެކެވެ. އޭގެ މާނައަކީ ޕީނަޓް ބަޓާ އަކީ ސިކުނޑި އަށް ވަރަށް ރަނގަޅު، ގިނައިރު ވަންދެން ބަނޑުހައި ނުވެ ހުރުމަށް އެހީތެރިވެދޭ އެއްޗެއް ކަމެވެ. ހެނދުނު ސީރިއަލް ކާއިރު، ކިރު ތަށީގެ ތެރެއަށް ކުޑަ ޕީނަޓް ބަޓާ ކޮޅެއް އަޅައިގެން ކެވިދާނެ އެވެ. ޖުމްލަގޮތެއްގައި ހުރިހާ ބާވަތެއްގެ މަދުތަކަކީ ވެސް ސިކުނޑިއަށް ފައިދާހުރި އެއްޗެހި އެވެ. އެހެންކަމުން ކިޔަވަން ފެށުމުގެ ކުރިން ޕީނަޓް، ކެށޫނަޓް ނުވަތަ ވޮލްނަޓް ފަދަ މަދެއް ކެއުން ރަނގަޅު ވާނެއެވެ.
5. ތާޒާ މޭވާ
ފޮނި އެއްޗެއް ކާހިތްވާނަމަ، ޗޮކްލެޓް ކެއުމަށްވުރެ މޭވާގައި ހުންނަ ޤުދުރަތީ ހަކުރުތައް ހަށިގަނޑަށް މާ ރަނގަޅު ވާނެއެވެ. ބްލޫބެރީ ފަދަ ކުލަގަދަ މޭވާތަކަކީ ގިނަ އަދަދަކަށް އެންޓިއޮކްސިޑެންޓްތައް އެކުލެވިގެންވާ އެއްޗެހި އެވެ. އޭގެ އިތުރުންވެސް ދޮންކެޔޮ، އޮރެންޖު، ކަރާ ނުވަތަ ކޮންމެ ކަހަލަ މޭވާއެއްވެސް ކެއުން ރަނގަޅު ވާނެއެވެ.
6. ގްރީން ޓީ
ކެފެއިން އަކީ ކުރުކޮށް ބުނާނަމަ، އިމްތިހާނަށް ދިއުމުގެ ކުރިން ހަކަތަ ލިއްބައިދޭނެ ރަނގަޅު އެއްޗެކެވެ. އެހެންނަމަވެސް ރެޑްބުލް އާއި އެހެނިހެން އެނާޖީ ޑްރިންކްތައް ފަދަ ގިނަ އަދަދަކަށް ހަކުރު ހުންނަ އެއްޗެހި ނުބޯށެވެ. ކޮފީ އަކީ ވެސް ރަނގަޅު އެއްޗެކެވެ. އެހެންނަމަވެސް ކޮފީ ވެސް ބޯން ޖެހޭނީ ވަރަށް ބަލައިގެންނެވެ. މާގިނައިން ބޮއެފިނަމަ، ކަންކަމަށް ސަމާލުކަން ދެވޭ މިންވަރު ދަށްވާނެއެވެ. އަދި އާދަވެގެން އެހާ ގިނައިން ކޮފީ ބުއިމަކީ މުސްތަޤްބަލުގައި މީހާ މާބޮޑަށް ވަރުބަލި ކުރުވާނެ ކަމެކެވެ. ގްރީން ޓީ އަކީ ގިނަ އަދަދަކަށް ކެފެއިން ހުންނަ ބުއިންތަކަށްވުރެ ރަނގަޅު އެއްޗެކެވެ. އޭގެއިން ހަށިގަނޑަށް އެންޓިއޮކްސިޑެންޓްތައް ލިބިގެންދާއިރު، ސަމާލުކަން ދެވޭ މިންވަރުވެސް އިތުރުވާނެ އެވެ.