މޭނޭ ޕިޔާރް ކިޔާ އާއި ކުޗް ކުޗް ހޯތާ ހޭ އަދި ހަމް އާޕް ކޭ ހޭ ކޯން ފަދަ މަޝްހޫރު ފިލްމްތަކުގައި މަންމައެއްގެ ރޯލް ކުޅެފައިވާ ބޮލީވުޑްގެ ބަތަލާ ރީމާ ލަގޫ މަރުވެއްޖެ އެވެ.
މީޑިއާ ރިޕޯޓްތައް ބުނާ ގޮތުގައި މޭގައި ރިއްސާތީ އިއްޔެގެ ވަގުތެއްގައި މުމްބާއީގެ ކޮކިލާބަން ދިރްބާނީ އަމްބާނީ ހޮސްޕިޓަލްގައި ފަރުވާ ދެމުން ދަނިކޮށް 59 އަހަރުގެ ރީމާ މަރުވީ ހާޓްއެޓޭކެއް ޖެހިގެންނެވެ.
ހިންދީ ފިލްމްތަކުގެ އިތުރުން މަރާޓީ ފިލްމްތަކާއި ޓީވީ ސިލްސިލާތަކުގައި ވެސް މަސައްކަތްކޮށްފައިވާ ބަތަލާ މަރުވި އިރު، އޭނާ ގެންދިޔައީ ސްޓާ ޕްލަސް އިން ދައްކަމުން އަންނަ ސިލްސިލާ "ނާމްކަރަން" ގައި ވެސް މުހިއްމު ރޯލެއް ކުޅެމުންނެވެ.
ރީމާ ފިލްމުތަކުގައި ކުޅެފައިވާ ގެވެހި މަންމައެއްގެ ރޯލްތަކާ އެކު އޭނާ ވަނީ އެތައް ބައެއްގެ ހިތްތައް އަތުލައިފަ އެވެ.
ފިލްމްތަކުގައި ރީމާ ވަނީ ސަލްމާން ހާނާއި ޝާހްރުކް ހާން އަދި ސަންޖޭ ދަތާއި ކާޖޮލް، ކަރިޝްމާ ކަޕޫރް ފަދަ މަޝްހޫރު ތަރިންގެ މަންމައެއްގެ ރޯލް ކުޅެފަ އެވެ.