ހިތަދު އަށް ރޭ ނަގޫރޯޅިއެއް އަރައި ގެއްލުން ލިބުނު ގެތަކުގެ މީހުންނަށް ދޭން ޖެހޭ އެހީތެރިކަން ވީހާ ވެސް އަވަހަށް ދީ ނިންމާލައި، އެ މީހުންގެ ދިރިއުޅުން އާންމު ހާލަތަަކަށް ގެނައުމަށް މަސައްކަތް ކުރަމުން އަންނަ ކަމަށް ނެޝަނަލް ޑިޒާސްޓާ މެނޭޖްމަންޓް ސެންޓަރް (އެންޑީއެމްސީ) އިން ބުނެފި އެވެ.
އެތަނުގެ ވެރިޔާ އަދި ޑިފެންސް މިނިސްޓްރީގެ ޑެޕިއުޓީ މިނިސްޓަރު ތަސްނީމް އަހުމަދު ޓީވީއެމްގެ ދޭއްގެ ހަބަރުގައި ވިދާޅުވީ ލިބުނު ގެއްލުންތައް މިހާރު ބަލަމުން އަންނަ ކަމަށެވެ.
އޭނާ ވެސް ފާހަގަ ކުރެއްވި ގޮތުގައި ނަގޫރޯޅި އަރައި 13 ގެއަކަށް ބޮޑެތި ގެއްލުންތައްވެފައިވެ އެވެ. އޭގެ ތެރޭގައި ފުރާޅު އެއްލާލި ގެތައް ވެސް ހިމެނެ އެވެ.
މީގެ އިތުރުން ހިތަދޫ ބޮޑު މަގުގައި ހުންނަ އައިލެންޑް ބުކްޝޮޕްގެ ފުރާޅަށް ވެސް ވަނީ ގެއްލުންވެފަ އެވެ.
ތަސްނީމް ވިދާޅުވި ލިބުނު ގެއްލުން އައްޑޫ ސިޓީ ކައުންސިލާއި ސަރުކާރުގެ ކަމާބެހޭ އެހެން މުއައްސަސާތައް ގުޅިގެން ވަރަށް ބުރަކޮށް މަސައްކަތްކޮށްގެން ބަލަމުން އަންނަ ކަމަށެވެ.
އަދި ޑިޒާސްޓަ ސެންޓަރުގެ ޓީމެއް މިހާރު އައްޑު އަށް ފުރާފައިވާ ކަމަށް ވެސް ވިދާޅުވި އެވެ. އެ ޓީމްގައި ރައީސްގެ މަންދޫބެއްގެ ގޮތުން ޑިފެންސް މިނިސްޓަރު އާދަމް ޝަރީފް ވެސް އައްޑު އަށް ވަޑައިގަންނަވާނެ އެވެ.
"އަޅުގަނޑުމެން މަސައްކަތް ކުރާނަން ގެއްލުން ލިބުނު އާއިލާތަކަށް ރޯދައިގެ ކުރިން އެހީތެރިކަން ދީ ނިންމާލައި، އެ އާއިލާތަކުގެ ދިރިއުޅުން އާންމު ހާލަތަކަށް ގެނައުމަށް." ތަސްނީމް ވިދާޅުވި އެވެ.