ބުދަ ދުވަހުގެ ރޭ ހިތަދު އަށް އެރި ނަގޫރޯޅީގައި ގެއްލުން ލިބުނު އެއްވެސް ގެއެއްގެ މީހުން ގެ މަރާމާތު ކުރަން އަމިއްލަ އަށް އެއްވެސް ހަރަދެއް ކުރަން ނުޖެހޭނެ ކަމަށް އެކަމާ ގުޅިގެން ރައީސް އަބްދުﷲ ޔާމީން އައްޑު އަށް ފޮނުއްވި ވަފުދުގައި ހިމެނޭ ރައްޔިތުންގެ މަޖިލީހުގެ ހުޅުދޫ ދާއިރާގެ ޕީީޕީއެމް މެމްބަރު މުހައްމަދު ޝާހިދު (ޝާޑް) ވިދާޅުވެއްޖެ އެވެ.
އޭނާ ވިދާޅުވީ ފުރާޅު އެއްލާލައި އެންމެ ބޮޑަށް ގެއްލުންވި ގެތައް މަރާމާތު ކުރުމުގެ މަސައްކަތް ވަރަށް ބާރަށް ކުރިއަށްދާ ކަމަަށެވެ.
ޝާޑް ވިދާޅުވީ ގެތައް މަރާމާތު ކުރުމުގެ ހުރިހާ ހަރަދެއް ކުރަނީ ސަރުކާރުން ކަމަށެވެ.
އެގޮތުން އެސްޓީއޯ އިން ޓިނާއި ލަކުނޑި އަދި ސިމެންޓް ނަގައިގެން މަރާމާތުތައް ކުރިއަށްދާ ކަމަށް ވިދާޅުވި އެވެ.
މީގެ އިތުރުން ގެތަކުގެ ހިފައިގެންގުޅޭ ސާމާނާއި ފަރުނީޗަރު ފަދަ ތަކެއްޗަށް ވެސް ގެއްލުންވެފައިވާތީ އެ ގެއްލުންތަކުގެ ލިސްޓް ނަގަމުންދާ ކަމަށް ޝާޑް ވިދާޅުވި އެވެ.
އެހެންވެ ނަގޫރޯޅީގައި ހިތަދޫގެ ގެތަކަށް ލިބުނު ހުރިހާ ގެއްލުމަކަށް ސަރުކާރުން އެހީ ދޭނެ ކަމަށް ވިދާޅުވި އެވެ.