"ކްއީން" އާއި "ހައުސްފުލް 3" ފަދަ ފިލްމްތައް ކުޅެފައިވާ ބޮލީވުޑްގެ ބަތަލާ އަދި މޮޑެލް ލީޒާ ހޭޑަން ފިރިހެން ކުއްޖަކު ވިހައިފި އެވެ.
މިއަދު ލީޒާ ކުރި ޓްވީޓެއްގައި ބުނީ ވިހެއީ މި މަހުގެ 17 ވަނަ ދުވަހު ކަމަށާއި ވަރަށް އުފަލުން ހުރި ކަމަށެވެ.
އޭނާ އަދި ވަނީ ދަރިފުޅުގެ ނަން ވެސް އިއުލާންކޮށްފަ އެވެ. ލީޒާގެ އަލަތު ދަރިފުޅަަށް ދީފައިވާ ނަމަކީ ޒެކް ލަލްވާނީ އެވެ.
ޑީނޯ ލަލްވާނީ އާއި ލީޒާ ކައިވެނި ކުރީ މިދިޔަ އަހަރުގެ އޮކްޓޯބަރު މަހުގެ ތެރޭގަ އެވެ.
ބަނޑުބޮޑުވުމާ އެކު ލީޒާ ގެންދިޔައީ ސޯޝަލް މީޑިއާގައި އޭނާގެ ފޮޓޯތައް ވަރަށް ބޮޑަށް އާންމު ކުރަމުންނެވެ. އެގޮތުން ބަނޑާ އެކު އެކި ގޮތްގޮތަށް ނަގާފައިވާ ފޮޓޯތައް ހިއްސާކޮށްފައިވެ އެވެ.
އޭނާ ވިހެއިކަން އިއުލާން ކުރުމަށް ފަހު، ފިރިމީހާ އާއި ދަރިފުޅާ އެކު ގޭގެ ބޭރުގައި މަޑުކޮށްގެން ތިބެ ނަގާފައިވާ ފޮޓޯއެއް ވެސް ހިއްސާކޮށްފައިވެ އެވެ.