ތިން ފަހަރަށް ނެޝަނަލް އެވޯޑް ހޯދާފައިވާ ބޮލީވުޑްގެ މަޝްހޫރު ބަތަލާ ކަންގަނާ ރަނާވަތު ޑައިރެކްޓް ކުރާ ފުރަތަމަ ފިލްމާ ބެހޭ މައުލޫމާތު މީޑިއާތަކާ ހިއްސާކޮށްފި އެވެ.
އޭނާ ލިޔެ، ޑައިރެކްޓްކޮށް އަދި ލީޑް ރޯލް ވެސް ކުޅޭ ފިލްމަށް ދީފައިވާ ނަމަކީ "ތޭޖޫ" އެވެ. ކަންގަނާ ބުނީ މި ފިލްމުގައި ކިޔައި ދޭނީ އުމުރުން 80 އަހަރުގެ އަންހެނެއްގެ ވާހަކަ ކަމަށެވެ. އެއީ ތޭޖޫ ނަމަކަށް ކިޔާ 80 އަހަރުގެ މީހެކެވެ. އެ ރޯލް ކުޅޭނީ ކަންގަނާ އެވެ.
އޭނާ ބުނީ އުމުރުން ދުވަސްވީ މީހެއްގެ ވާހަކަ ކިޔައިދޭ ފިލްމެއް ހަދަން ނިންމީ އޭނާއަކީ ވަރަށް ޅަ އުމުރުގައި އުމުރުން ދުވަސްވީ މީހުންގެ ދިރިއުޅުން ވަރަށް ގާތުން ތަޖުރިބާ ކުރެވުނު މީހަކަށްވާތީ ކަމަށެވެ.
އަދި އެފަދަ މީހުންނަކީ މުޖުތަމައުގެ ތެރެއިން ވަރަށް ބޮޑަށް ބާކީކޮށްލެވިފައިވާ ބައެއް ކަމަށާއި "ތޭޖޫ" ގައި ކިޔައި ދޭނީ އެފަދަ މީހެއްގެ ވާހަކަ ކަމަށް ބުންޏެވެ.
"ތޭތޫ" ގެ އެއް ޕްރޮޑިއުސަރަކީ ވެސް ކަންގަނާ އެވެ. މި ފިލްމް ޕްރޮޑިއުސް ކުރަނީ ދާދި ފަހުން ލޯންޗް ކުރި އޭނާގެ ތާރީހީ ފިލްމް "މަނިކަރްނިކާ" ގެ ޕްރޮޑިއުސަރު ޝައިލޭޝް ސިންގާއި ކަންގަނާ އެވެ.
ކަންގަނާ މިހާރު ވަނީ މަނިކަރްނިކާ ފިލްމްގެސް ނަމުގައި އަމިއްލަ ޕްރޮޑަކްޝަން ހައުސްއެއް ވެސް ލޯންޗްކޮށްފަ އެވެ.
އޭނާ ބުނީ "ތޭޖޫ" އަންނަ އަހަރުގެ ޑިސެމްބަރު މަހުގެ ތެރޭގައި ބެލުންތެރިންނާ ހަމައަށް ގެނެސް ދޭނެ ކަމަށެވެ.
ކަންގަނާ ދެން އެންމެ އަވަހަށް ފެނިގެން ދާނީ ސެޕްޓެމްބަރު 15 ގައި ރިލީޒް ކުރާ "ސިމްރަން" އިންނެވެ.