މޯލްޑިވްސް މީޑިއާ ކައުންސިލް (އެމްއެމްސީ) އިން ދޭ ނޫސްވެރިކަމުގެ އެވޯޑަށް ކުރިމަތިލުމުމުގެ ފުރުސަތު މިއަދު ހުޅުވާލައިފި އެވެ.
އެވޯޑް ކުރިމަތިލުމުގެ އެންމެ ފަހު ސުންގަޑިއަކީ އަންނަ މަހުގެ 8 ވަނަ ދުވަހެވެ.
އެމްއެމްސީގެ ރައީސް އަބްދުލް މުއީދު ހަސަން ވިދާޅުވީ ނޫސްވެރިކަމުގެ އިނާމަށް ކުރިމަތިލާ މީހުންނަށް އެވޯޑް ދާން ބާއްވާ ހަފުލާ އޮންނާނީ އަންނަ އޮގަސްޓް މަހުގެ ތެރޭގައި ކަމަށެވެ.
އެހެން ނަމަވެސް ރަސްމީކޮށް އަދި ވަކި ތާރީހެއް ނުނިންމަ އެވެ.
މި އަހަރު ނޫސްވެރިކަމުގެ އިނާމު އަށް ދާއިރާއަކުން ދޭން ވަނީ ނިންމާފަ އެވެ. އެއީ އިޖުތިމާއީ، ސިޔާސީ، ޝަރުއީ، ވިޔާފާރި، ކުޅިވަރުގެ، ފޮޓޯ ޖާނަލިޒަމްއަދި ވީޑިއޯ ޖާނަލަޒިމްގެ ދާއިރާ އެވެ.
މީގެ އިތުރުން މި އަހަރު ފީޗާ ލިއުމުގެ ދާއިރާއިން ވެސް އިނާމު ދޭނެ އެވެ.
އެމްްއެމްސީން ބުނީ އެ އަށް ދާއިރާގެ އިތުރުން ލައިފްޓައިމް އެޗީވްމަންޓް އިނާމާއި އެންމެ އުއްމީދީ ނޫސްވެރިޔާ ވެސް މި އަހަރު ހޮވާނެ ކަމަށެވެ.
ނޫސްވެރިކަމުގެ އިނާމު މި އަހަރު ދޭން ނިންމާފައި ވަނީ ހުރިހާ އެވޯޑެއް ވެސް އެއް އުސޫލެއްގެ ދަށުންނެވެ.
މީގެ ކުރިން ނޫސްވެރިކަމުގެ އިނާމް ދެމުން އައީ ކޮންމެ އަހަރަކަށް ވެސް ވަކި ގަވައިދެއް ހަދައިގެންނެވެ. އާ އުސޫލު އެކުލަވައިލީ އެގޮތަށް އެކަން ކުރުމުގައި ދަތިތަކެއް ހުރުން ކަމަށް އެމްއެމްސީން ބުންޏެވެ.
އެ އުސޫލުގައި ބުނަނީ އާންމުކޮށް ދާއިރާތަކުން އަދި ވީޑިއޯ ޖާނަލިޒަމްގެ އިނާމަށް ހުށަހަޅާ އިރު ހަތް އާޓިކަލް/ރިޕޯޓް ހުށަހަޅަން ޖެހޭނެ ކަމަށެވެ. އަދި ފޮޓޯ ޖާނަލިޒަމް އިނާމަށް 10 ފޮޓޯ ހުށަހަޅަން ޖެހޭ އިރު ފީޗާ ލިޔުމުގެ ދާއިރާއިން ހުށަހަޅަން ޖެހޭނީ އެންމެ އާޓިކަލެކެވެ.
އެމްއެމްސީން މީގެ ދެ އަހަރު ކުރިން ދޭން ފެށި، ނޫސްވެރިކަމުގެ އިނާމަކީ މެއި 3 ގައި ފާހަގަ ކުރާ ދުނިޔޭގެ ނޫސްވެރިކަމުގެ ދުވަހާ ގުޅުވައިގެން ދޭ އެވޯޑެކެވެ.
އެހެން ނަމަވެސް މި އަހަރުގެ އެވޯޑް ދިނުން ލަސްވީ އުސޫލު އެކުލަވާނުލެވިގެން ކަމަށް އެމްއެމްސީން ބުންޏެވެ.