ހިތަދު އާއި މަރަދޫގެ އޮޑިދޯނިހަރަށް ފަސޭހަ އިން ފެން ލިބޭނެ އިންތިޒާމް ހަމަޖައްސައި ދިނުމުގެ ގޮތުން އައްޑޫ ސިޓީ ކައުންސިލުން ކޮންޓްރެކްޓަރަކާ ހަވާލުކޮށްގެން މަސައްކަތް މިއަދު ކުރަމުން ދަނިކޮށް ހައުސިން މިނިސްޓްރީގެ އެންގުމަކަށް މަސައްކަތް ހުއްޓާލަން ފުލުހުން އެންގި ނަމަވެސް، ކޮންޓްރެކްޓާ އެއްގޮތަށް މަސައްކަތް ކުރިއަށް ގެންދާނެ ކަމަށް ވަސަން މޯލްޑިވްސް ޕްރައިވެޓް ލިމިޓެޑުން މިއަދު ބުނެފި އެވެ.
ހިތަދޫ ބަނދަރަށް ފެން ގުޅުމުގެ މަސައްކަތް ހުއްޓާލަން މިނިސްޓްރީން އެންގި ސަބަބެއް ސާފުވާ ގޮތެއް ނުވެ އެވެ.
ވަސަންއާ ހަވާލު ކުރި މަސައްކަތުގެ ދަށުން ހިތަދޫ އުތުރު ސަރަހައްދުގައި (ލިންކް ކުޑަކުދިންގެ ޕާކްގެ ކުރިމަތިން އޮތް ސަރަހައްދުގައި) ޕަންޕް ސްޓޭޝަން ހަދައި، އިސްކުރުތައް މިހާރު ވަނީ ބަހައްޓައިފަ އެވެ.
މީގެ އިތުރުން ހިތަދޫ ބަނދަރުގައި ބަހައްޓާ އިސްކުރުތަކަށް ހޮޅި ގުޅުމުގެ މަސައްކަތް މިހާރު ވެސް އަންނަނީ ކުރަމުންނެވެ.
މި މަޝްރޫއުގެ ދަށުން ހިތަދޫ ޓްރެކް ސަރަހައްދުގައި ފެންވަރާ ޝަވަރުތަކެއް ހުންނަ ސްޓޭންޑްގެ ހޮޅީގެ މަސައްކަތާއި ކޮންކްރިޓް މަސައްކަތް ވެސް ވަނީ ނިންމައިފަ އެވެ.
ވަސަންގެ އޮފިޝަލަކު މިއަދު "އައްޑޫ ލައިވް" އަށް ބުނީ ފުލުހުން މަސައްކަތް ހުއްޓާލަން އެންގި ނަމަވެސް، މަސައްކަތް ހުއްޓާ ނުލައި ކުރިއަށް ގެންދާނެ ކަމަށެވެ.
މިއަދު މެންދުރުގެ ވަގުތެއްގައި ފުލުހުން މަސައްކަތް ކުރާ ސަރަހައްދަށް ގޮސް މަސައްކަތް ނުކުރަން އެންގި އެވެ. އެހެން ނަމަވެސް ހިތަދޫގެ މަސްވެރިންތަކެއް ނިކުމެ، ވަނީ މަސައްކަތް ނުހުއްޓުވޭނެ ކަމަށް ބުނެ، މަސައްކަތް އަލުން ފަށުވައިފަ އެވެ.
އޮފިޝަލް ވިދާޅުވީ މިއީ ކައުންސިލުން ވަސަންއާ ހަވާލުކޮށްގެން ކުރިއަށް ގެންދާ ކަމަކަށްވާތީ، ކައުންސިލުން މަސައްކަތް ހުއްޓާލަން އެންގުމުން ނޫނީ މަސައްކަތް ނުހުއްޓާނެ ކަމަށެވެ.
"ކައުންސިލުން އަޅުގަނޑުމެންނަކަށް ނެތް މަސައްކަތް ހުއްޓާލަން އަންގާފައެއް. އެހެންވީމާ އެއްބަސްވުމާ އެއްގޮތަށް ދީފައިވާ މުއްދަތަށް މަސައްކަތް ނިންމުން އަމާޒަކީ،" އޭނާ ވިދާޅުވި އެވެ.
އޭނާ އަދި ވިދާޅުވީ ފުލުހުން މަސައްކަތް ހުއްޓާލަން އެނގުމުން ކައުންސިލަށް ގުޅައިގެން އެއީ ކިހިނެއްވާ ކަމެއްތޯ ސާފު ކުރި ކަމަށެވެ.
"ކައުންސިލުން ބުނީ ހައުސިން މިނިސްޓްރީއަކުން ވެސް އަދި އެހެން ފަރާތަކުން ވެސް އެ މަސައްކަތް ކުރިއަށް ނުގެންދަން ކައުންސިލަށް ވެސް އަންގާފައި ނެތް ކަމަށް. އަދި އަޅުގަނޑުމެންނަށް ވެސް ސަރުކާރުގެ އެއްވެސް މުއައްސަސާއަކުން ވެސް މި މަސައްކަތް ހުއްޓާލަން ރަސްމީކޮށް ލިޔުމަކުން ވެސް އަންގާފައެއް ނެތް،" އޭނާ ވިދާޅުވި އެވެ. "އެހެންވެ މަސައްކަތް ހަމަ ކުރިއަށް ގޮސް ނިންމާނެ."
ވަސަން އިން ބުނީ މަރަދޫގެ މަސައްކަތް މާދަމާ ފަށާނެ ކަމަށެވެ.
އައްޑޫ މޭޔަރު އަބްދުﷲ ސޯދިގް (ސޯބެ) ވެސް މިއަދު ވިދާޅުވީ ފެން ގުޅުމުގެ މަސައްކަތް ނުހުއްޓި ކުރިއަށްދާ ކަމަށެވެ. އެ މަސައްކަތަށް އެންމެ ބޮޑު ހިތްވަރެއް މިހާރު ދެނީ މަސްވެރިން ކަމަށެވެ.
އޮޑިވެރިންނަށް ހާއްސަކޮށްގެން ކައުންސިލުން މިފަދަ މަޝްރޫއެއް ފެށުމާ އެކު، ސަރުކާރުން މިކަމަށް ހުރަސް އެޅުމުން އައްޑޫގެ ބައެއް މީހުން އަންނަނީ ސަރުކާރަށް ވަރަށް ބޮޑަށް ފާޑު ވެސް ކިޔަމުންނެވެ.
އަދި މިއީ ކައުންސިލުން ކުރާ ތަރައްގީގެ ކަންކަމަށް ސަރުކާރުން ހުރަސް އެޅުން ކަމަށް ގިނަ ބަޔަކު ދަނީ ސިފަ ކުރަމުންނެވެ.