ޖިންސީ ގޮތުން ޖެހޭ ބަލިތަކަކީ ކޮންމެހެން ހަމައެކަނި ޖިންސީ ގުޅުން ހިންގައިގެން ޖެހޭ ބަލިތަކެއް ނޫނެވެ. ޖިންސީ ގުޅުން ހިންގުމާއި ނުލައި އެބަލިތައް ޖެހުމަކީ ވަރަށް މަދު ފަހަރަކު ދިމާވާ ކަމަކަށް ވިޔަސް، އެކަމުގެ ފުރުސަތު ކޮންމެވެސް ވަރަކަށް އެބައޮތެވެ. އެހެންކަމުން އެކަމާއި ބޮޑަށް ސަމާލުވުމަކީ ވަރަށް މުހިންމު ކަމެކެވެ. ތިރީގައި މިވަނީ ނޭނގި ޖިންސީ ބަލިތައް ޖެހިދާނެ ބައެއް ގޮތްތަކެވެ.
1. ބިކިނި ވެކްސް އެއް ކުރުވުން
ބިކިނި ވެކްސް ކުރުމަކީ ރާއްޖޭގައި ވެސް މިހާރު ވަރަށް އާންމު ކަމެކެވެ. އިސްތަށި ބޭލުމަށް އޮތް ފަސޭހަ ގޮތެއް ނަމަވެސް، އެއީ ވަރަށް ބޮޑަށް ތަދުވާ ކަމެކެވެ. މީގެ އިތުރުން ވެކްސް ކުރާއިރު، ވެކްސް ސްޓިކް އެއްފަހަރު ބޭނުން ކުރުމަށްފަހު، ހަމަ އެ ސްޓިކް ދެވަނަ ފަހަރަށް ވެކްސްގެ ތެރެއަށް ލުމަކީ ނުރައްކާތެރި ކަމެކެވެ. ކޮންމެ ވެކްސް ސްޓިކް އެއް ވެސް ބޭނުންކުރަން ޖެހޭނީ އެއް ފަހަރެވެ. އެއީ އެސްޓީއައި (ޖިންސީ ގޮތުން ގައިން ގަޔަށް އަރާ އިންފެކްޝަންތައް) ޖެހިފައި ހުރި މީހަކު ވެކްސް ކުރުމަށް ބޭނުންކުރާ ސްޓިކް، ދެވަނަ ފަހަރަށް ވެކްސްގެ ތެރެއަށް ލުމަކީ އެހެން މީހަކަށް އެ އިންފެކްޝަން ފެތުރުމުގެ ފުރުސަތު ބޮޑުކޮށްދޭ ކަމަކަށް ވާތީއެވެ.
2. ފިރިހެން މީހާގެ ތުނބުޅިން
މިހާރަކަށް އައިސް ގިނަ އަންހެން ކުދިންނަށް ރީތީ ތުނބުޅި ލާފައި ހުންނަ ފިރިހެނުންނެވެ. ގިނަ މީހުންނަށް ނޭނގޭ ކަމަކީ ތުނބުޅި އަކީ ވަރަށް ގިނަ ޖަރާސީމާއި ބެކްޓީރިއާ ހެދިބޮޑުވާ ސަރަޙައްދެކަމެވެ. ބޮޑެތި ތުނބުޅިތަކަކީ ބެކްޓީރިއާ ހެދިބޮޑުވުމަށް އެހީތެރިވެދޭ އެއްޗެކެވެ. އޭގެ ސަބަބުން ހާޕީސް އާއި އެހެނިހެން ފަންގަލް އިންފެކްޝަންތައް ޖެހެއެވެ. އަދި ހަމަ އެހެންމެ ތުނބުޅީގައި އުކުނު އެޅުމަކީ ވެސް އެކަށީގެންވާ ކަމެކެވެ.
3. ދެމީހުން އެއް ލިޕް ބާމް ޝެއާ ކުރުން
ރީތިވާ ސާމާނު ވިއްކާ ފިހާރަތަކުގައި ހުންނަ ޓެސްޓާ ޕްރޮޑަކްޓްތައް ބޭނުންކުރާ މީހުންނަށް މިއީ ވަރަށް ހިތާމަވެރި ޚަބަރެކެވެ. އޯރަލް ހާޕީސް ޖެހިފައި ހުރި މީހަކު ބޭނުންކުރާ ލިޕް ބާމް ބޭނުން ކުރުމަކީ އެސްޓީއައި އެއް ޖެހުމުގެ ފުރުސަތު އިތުރުކޮށްދޭ ކަމެކެވެ. އެސްޓީއައި ބެކްޓީރިއާ އަކީ ދިރުން ނެތް އެއްޗެހީގައި އާލާވާ އެއްޗެއް ނޫނަސް، މިފަދަ ނާޒުކު މައްސަލަތަކުގައި ރިސްކެއް ނެގުމަކީ ބުއްދިވެރި ކަމެއް ނޫނެވެ.