ރައްޔިތުންގެ މަޖިލީހުގެ ފޭދޫ ދާއިރާގެ ޕީޕީއެމްގެ މެމްބަރު އިބްރާހީމްދީދީ (އައިބީ) އަށް މީގެ ކުރިން އެންމެ ބޮޑަށް ތާއީދު ކުރަމުން ދިޔަ ޕީޕީއެމްގެ ފޭދޫގެ އެކްޓިވިސްޓެއް ކަމަށްވާ އީނާ ނަސީރު ފޭސްބުކްގައި އައިބީގެ ފޮޓޯ އެކޮޅުކޮޅުން ޖަހައި، އޭނާ އަށް ދެން ދުވަހަކު ވެސް ތާއީދެއް ނުކުރާނެ ކަމަަށް ބުނެފި އެވެ.
ދެހާސް ސާދަ ވަނަ އަހަރު ބޭއްވި އައްޑޫ ސިޓީ ކައުންސިލްގެ ފޭދޫގެ ބައި އިލެކްޝަނަށް ޕީޕީއެމްގެ ޓިކެޓްގައި ވާދަކޮށް އައިބީ ވަަރަށް ގަދަ އަށް ކެމްޕޭންކޮށްގެން ވެސް ނުހޮވުނު އީނާ މިއަދު ފޭސްބުކްގައި ބުނެފައި ވަނީ "ކިތަންމެ ގިނަ ބަޔަކު ތިބި މަޖިލީހެއްގައި ވެސް އީންއަކީ އެމްޑީޕީ މީހެއް ކަމަށް އައިބީ ވިދާޅުވިޔަސް، އޭގެ ފައިދާއެއް އައިބީ އަށް ނުކުރާނެ" ކަމަށެވެ.
"އަދި ރައީސް ޔާމީނަށް އީން ކުރަމުން އަންނަ ތާއީދަށް އެންމެ ފިޔަވަޅެއް ވެސް ފަހަތަކަަށް ނުޖެއްސޭނެ. އަދި ކިތަންމެ ރުޅި އަޔަސް، ފިތުނަ ހެދިޔަސް އިބްރާހީމްދީދީއަކަށް ދެނެއް ތާއީދެއް ނުކުރާނަން،" އީނާ ފޭސްބުކްގައި ބުންޏެވެ.
އައިބީ އާއި އީނާއާ ދެމެދު "ކޯޅުންތަކެއް" އުފެދިފައިވާ އިރު، އީނާ ވަނީ މި ސަރުކާރުން އޭނާ އަށް ދިން މަގާމުން ވެސް އަމިއްލަ އަށް މިދިޔަ އަހަރުގެ އޮކްޓޯބަރު މަހު އިސްތިއުފާ ދީފަ އެވެ.
ގަމުގައި ހުންނަ އެސްޓީއޯ ސަބްސިޑަރީ ކުންފުނި އެފްއެސްއެމްގެ އިސް މަގާމެއް އީނާ ވަނީ ކުރިން އަދާކޮށްފަ އެވެ.
އީނާ މަގާމުން އަމިއްލަ އަށް ވަކިވިތާ މާ ގިނަ ދުވަސްތަކެއް ނުވެ އޭނާގެ ފިރިމީހާ މުހައްމަދު ފައިސަލް ވަނީ ސަރުކާރުގެ މަގާމުން ވަކިކޮށްފަ އެވެ.
ފައިސަލް ވަނީ ހައުސިން މިނިސްޓްރީގެ ކޯޑިނޭޓަރުކަންކޮށްފަ އެވެ. އޭނާ އެ މަގާމުން ވަކި ކުރީ މިދިޔަ ފެބްރުއަރީ މަހުގެ ތެރޭގަ އެވެ.
ދާފި ފަހުން އީނާ "އައްޑޫ ލައިވް" އަށް ދިން އިންޓަވިއުއެއްގައި ވެސް އައިބީ އަށް ވަަރަށް ބޮޑަށް ފާޑު ކިޔައިފަ އެވެ.
އޭނާ ބުނީ ރައީސް އަބްދުﷲ ޔާމީނަށް އައްޑުއާ ގުޅޭ ގޮތުން އައިބީ ދައްކަަވަނީ އަސްލު މަންޒަރެއް ނޫން ކަމަށެވެ.
އަދި މި ފަހަރުގެ ލޯކަލް ކައުންސިލް އިންތިހާބުގައި ޕީޕީއެމަށް އައްޑޫ ސިޓީ ކައުންސިލްގެ އެންމެ ގޮނޑިއެއް ވެސް ނުލިބަމަކީ އޭގެ ހެއްކެއް ކަމަށް ޕީޕީއެމްގެ އައްޑޫ ގިނަ މެމްބަރުން ވެސް މިހާރު ގަބޫލު ކުރާކަން ފާހަގަ ކުރެވެ އެވެ.