އައްޑޫ ސިޓީ ކައުންސިލަށް އިންތިހާބުވެވަޑައިގެންނެވި ކައުންސިލަރުން ހުވާ ކުރުން ކައިރިވަމުން އަންނަ އިރު، މިހާރު އެންމެ ގިނަ ބަޔަކު ކުރާ ސުވާލަކީ މި އެވެ؛ މި ފަހަރު ޑެޕިއުޓީ މޭޔަރަކަށް ވާނީ ކާކުތޯ އެވެ؟
މޭޔަރުގެ މަގާމާ ދޭތެރޭ ގިނަ ބަޔަކު ސުވާލެއް ނުއުފައްދަ އެވެ. ސަބަބަކީ މި ފަަހަރު ވެސް މޭޔަރަކަށް ވާނެ ކަމަށް ގަބޫލު ކުރެވެނީ ކައުންސިލްގެ ފުރަތަމަ ދެ ދައުރުގައި ވެސް މޭޔަރުކަން ކުރެއްވި އަދި މިހާރު ވެސް ކުރައްވަމުން ގެންދަވާ ހިތަދޫ އުތުރު ދާއިރާގެ ކައުންސިލަރު އަބްދުﷲ ސޯދިގް (ސޯބެ) ކަމަށްވުމެވެ.
އެ މަގާމުގެ ތަޖުރިބާ އާއި ކައުންސިލަރުގެ ތަޖުރިބާ އެންމެ ބޮޑަށް ލިބިވަޑައިގެން ހުންނެވި ބޭފުޅަކީ ސޯބެ އެވެ.
އަލަށް ހުވާ ކުރާ ކައުންސިލަކީ ސޯބެގެ ތިން ވަނަ ދައުރެވެ. އެހެންވެ މޭޔަރަކަށް މި ފަހަރު ވެސް ވާން އެންމެ އެކަށޭނެ ބޭފުޅަކީ ސޯބެ، އިންތިހާބުވި ބޭފުޅުން ވެސް ގަބޫލް ކުރައްވަ އެވެ.
އެކަމަކު މޭޔަރުކަމަށް ވާދަ ކުރައްވާނެ ވާހަކައެއް ސޯބެ މިހާތަނަށް ވިދާޅުވެފައެއް ނެތެވެ. އެހެންވެ އެއީ އޭނާ އަށް އެ މަގާމު މިހާރު ވެސް ކަށަވަރުވެއްޖެ ކަމުގެ ނިޝާނެއް ކަމަށް ބައެއް މީހުން ދެކެ އެވެ.
އެހެންވެ ސުވާލަކީ ޑެޕިއުޓީ މޭޔަރަކަށް ދެން ވާނީ ކާކުތޯ އެވެ؟
މިހާރު އިވޭ އަޑުތަކަށް ބަލާއިރު ޑެޕިއުޓީ މޭޔަރގެ މަގާމަށް ފަސް ބޭފުޅަކު ޝައުގުވެރިވެއެވެ. އެއީ ދެކުނު ދާއިރާގެ ކައުންސިލަރު މުހައްމަދު ޔަސްރިފް އާއި ފޭދޫ ދާއިރާގެ ކައުންސިލަރ އަލީ ފަހުމީ އާއި މަރަދޫން ފައިސަލް އާއި ހުޅުދޫން ޝުކުރީ އަދި މީދޫ ކައުންސިލަރ ހިޔާޟުއެވެ.
ސޯބެ ފިޔަވައި އަލަށް އިންތިހާބުވި ކައުންސިލަރުންގެ ތެރެއިން މިހާރު ވެސް ކައުންސިލްގައި ތިއްބެވި ދެ ބޭފުޅުންނަކީ އަލީ ފަހުމީ އާއި މުހައްމަދު ޔަސްރިފްއެވެ .އެހެންވެ ތަޖުރިބާގެ ގޮތުން ބަލައިފި ނަމަ، އެ މަގާމަށް އެ ދެ މީހުން ވާދަ ކުރެއްވުމަކީ މައްސަލައެއް ނޫނެވެ. އަނެއްކޮޅުން ހުޅުދޫން އިންތިހާބްވި ޝުކުރީއަކީ ސިޔާސީ ނަޒަރުން ބަލާނަމަ ޑެޕިއުޓީ މޭޔަރއަކަށް ގެންނަން ރަނގަޅު ބޭފުޅެކެވެ. ސަބަބަކީ ޝުކުރީ ކާމިޔާބް ހޯއްދެވީ ޕީޕީއެމްގެ ސަޕޯޓް ބޮޑު ނުފޫޒު ގަދަ ރަށަކުންވީމައެވެ. އެކަމަކު ތުންތުންމަތިން އަޑު އިވޭ ގޮތުގައި ޑެޕިއުޓީ މޭޔަރުގެ މަގާމަށް ޔަސްރިފްގެ ޝައުގުވެރިކަން ބޮޑެވެ.
ކޮންމެ ގޮތެއް ވިޔަސް ވާނެ ގޮތެއް އެނގޭނީ އަންނަ މަހުގެ 3 ވަނަ ދުވަހުގެ ރެ އެވެ. އެ ރޭ ކައުންސިލަރުން ހުވާ ކުރުމަށް ފަހު، މޭޔަރާއި ޑެޕިއުޓީ މޭޔަރު ހޮވާނެ އެވެ.
އައްޑޫ ސިޓީ ކައުންސިލަށް ފުރަތަމަ ފަހަރަށް މި ފަހަރު ހަތް ކައުންސިލަރުން އިންތިހާބު ކުރި އިރު، ކައުންސިލަށް އަލަށް ހޮވިވަޑައިގަތް ބޭފުޅަކީ ހުޅުދޫ ކައުންސިލަރު އިބްރާހީމް ޝުކުރީ އާއި މީދޫ ކައުންސިލަރު ހުސައިން ހިޔާޒާއި މަރަދޫ ކައުންސިލަރު ފައިސަލް އިބްރާހީމް އަދި ހިތަދޫ މެދު ދާއިރާ ކައުންސިލަރު ޖަމްޝީދާ މުހައްމަދެވެ.
ޖަމްޝީދާއަކީ މިހާތަނަށް ކައުންސިލަށް ހޮވިވަޑައިގަތް ފުރަތަމަ އަންހެން ކައުންސިލަރެވެ.