ގެދޮރު ގަތުމުގެ އާ ސްކީމެއް ބޭންކް އޮފް މޯލްޑިވްސް (ބީއެމްއެލް) ގެ އިސްލާމިކުން މިއަދު ތައާރަފު ކޮށްފި އެވެ.
ބީއެމްއެލް އިސްލާމިކްގެ ޑިރެކްޓަރު ޒުލްގަރްނައިން ތަމަން ވިދާޅުވީ އަލަށް ތައާރަފު ކުރި ޕްރޮޑަކްޓަކީ އިސްލާމީ ޝަރީއާގެ ހަމަތަކަށް ފެތޭ ގޮތަށް ތައާރަފް ކުރި ހައުސިން ފައިނޭންސިން ޕްރޮޑަކްޓްތަކުގެ ތެރެއިން އެންމެ ފަހުގެ ޕްރޮޑަކްޓް ކަމަށެވެ.
އޭނާ ވިދާޅުވީ މިއަދު ތައާރަފު ކުރި ސްކީމަކީ އެންމެ ކުޑަ ލީސިންގް ރޭޓެއްގައި ގެދޮރު ގަތުމަށް ރާއްޖޭގައި ތައާރަފު ކުރެވޭ ފައިނޭންސިން ސްކީމަށް ކަމަށެވެ.
އެގޮތުން ކަސްޓަމަރުން ޑިޕޮސިޓް ކުރާ ފައިސާ ބަލަހައްޓާނީ މުޅިން ވަކި ފަންޑެއްގެ ގޮތުގައި ކަމަށާއި އެ ފައިސާ ބޭނުން ކުރަނީ އިސްލާމީ ޝަރުއީ ހަމަތަކަށް ފެތޭ ކަންކަމަށް ކަމަށް ވެސް އޭނާ ތަމަން ވިދާޅުވި އެވެ.
"އަމިއްލަ ގެދޮރުވެރި ބަޔަކަށް ވުމަށް މަސައްކަތް ކުރަމުންދާ އާއިލާތަކާއި އަމިއްލަ ފަރާތްތަކަށް އެހީތެރިކަން ފޯރުކޮށްދެވޭނެ ޕްރޮޑަކްޓެއް އާންމުންނަށް ތައާރަފް ކުރެވުމަކީ ވަރަށް ބޮޑު ހިތްހަމަޖެހުމެއް،" އޭނާ ވިދާޅުވި އެވެ. "ގިނަ އަދަދެއްގެ އެޕާޓްމަންޓް އަދި ރޯހައުސްތައް މިދުވަސްވަރު ރާއްޖޭގައި ދަނީ އަޅަމުން. މި ޕްރޮޑަކްޓް ވެގެން ދާނީ ޝަރީއާގެ ހަމަތަކަށް ފެތޭ އަދި މާކެޓްގައި މިވަގުތު އެންމެ ކުޑަ ރޭޓްގައި ގެދޮރު ގަތުމަށް ބޭނުންވެފައި ތިބި ކަސްޓަމަރުންނަށް ލުއި ފަސޭހަ ޕްރޮޑަކްޓަކަށް."
ބީއެމްއެލުން ބުނީ ސްކީމަށް އެދޭ ފޯމް ދޫކުރުމާއި ބަލައި ގަތުން ބީއެމްލްގެ ހުރިހާ ބްރާންޗަކުން ވެސް މިހާރު ކުރިއަށް ދާނެ ކަމަށެވެ.