ޖޭޕީ ދައްތާ 1997 ގައި ބޮޑު ކާސްޓަކާ އެކު ގެނެސް ދިން ހަނގުރާމަމަތީ ފިލްމް "ބޯޑަރު" އަކީ އަދިވެސް ބެލުންތެރިން އެ ފިލްމެއްގެ މަތިން ހަނދާން ކުރާ، ވަރަށް ކާމިޔާބު ފިލްމެވެ.
ފިލްމް ރިލީޒް ކުރިތާ 20 އަހަރުވީ ގިނަ ގިނަ ބަޔަކު އަދިވެސް އަންނަނީ ދައްތާގެ ފަރާތުން އެކަހަލަ އިތުރު ފިލްމެއް ފެންނާނެ ކަމަށް އުންމީދު ކުރަމުންނެވެ.
"ބޯޑަރު" އަކީ އިންޑިއާ އާއި ޕާކިސްތާނާ ދެމެދުޔ ހިނގާ ހަނގުރާމައެއް ދައްކުވައިދޭ ވަރަށް އަސަރު ގަދަ ފިލްމެކެވެ.
ފިލްމުގެ ކާސްޓުންގެ ތެރޭގައި ސުނިލް ޝެޓީ، ސަނީ ޑިއޯލް، ތާބޫ، އަކްޝަޔޭ ކަންނާ، ޕޫޖާ ބަޓް އަދި ޖެކީ ޝްރޮފް ފަދަ ތަރިން ހިމެނެ އެވެ.
"ބޯޑަރު" ގެ ފަހުން ދައްތާ ޑައިރެކްޓް ކުރި ފިލްމަކީ 2006 ގައި އަބިޝެކް ބައްޗަން އާއި އައިޝްވާރިޔާ ރާއީ ލީޑް ރޯލް ކުޅުނު "އުމްރާއޯ ޖާން" އެވެ.
އޭގެ ފަހުން އޭނާ މިހާތަނަށް އެއްވެސް ފިލްމެއް ޑައިރެކްޓެއް ނުކުރެ އެވެ. އެކަމަކު މިހާރު ދައްތާ އަންނަނީ ފިލްމެއް ހަދަން ތައޔްާރުވަމުންނެވެ.
ބޮލީވުޑްގެ އެންމެ ފަހުގެ ރިޕޯޓްތައް ބުނާ ގޮތުން އޭނާ މި ފަހަރު ހަދަން ނިންމާފައި ވަނީ 1962 ވަނަ އަހަރު އިންޑިއާ އާއި ޗައިނާއާ ދެމެދު ހިނގާފައިވާ ހަނގުރާއެއް ދައްކުވައިދޭ ފިލްމެކެވެ.
ބޮލީވުޑްގެ އެންމެ ފަހުގެ ހަބަރުތައް ބުނާ ގޮތުން އެ ފިލްމުގެ ނަމަކީ "ޕަލްޓަން" އެވެ.
ކާސްޓުންގެ ތެރޭގައި އަބިޝެކް، ޕުލްކިތު ސަމްރާޓް އަދި ސޫރަޖް ޕަންޗޯލީ ހިމެނެ އެވެ. އެހެން ނަމަވެސް ފިލްމުގެ ބަތަލާއިންނަކީ ކޮބައި ކަމެއް އަދި ނޭނގެ އެވެ.
"ޕަލްޓަން" ޝޫޓް ކުރަން ހަމަޖެހިފައި ވަނީ ލަޑަކް އާއި ސިއްކިމްގައި ކަމަށްވެ އެވެ. އަދި އެ ތަންތަނުގައި ޝޫޓް ކުރުމުގެ ހުއްދައަކަށް މިހާރު އެދިފައިވާ ކަމަށްވެ އެވެ.