މި ރަމަޟާން މަހާ ދިވެހިން ކުރިމަތިލި އިރު ރާއްޖޭގެ އެންމެ ބޮޑު އާބާދީތަކަށް ކަރަންޓްގެ ޔަގީންކަމެއް ނެތެވެ. މާލޭން ދޭތެރެ ދޭތެރެއިން ކަރަންޓް ކެނޑެމުން އަންނަ އިރު ތ. ތިމަރަފުށީ ރައްޔިތުން ކަރަންޓް ނެތި ދެ ދުވަސް ހޭދަކޮށްފި އެވެ.
މާލެ އަށް ބަލާ އިރު އަދިވެސް ލިބެނީ ކަރަންޓް ކެނޑިދާނެ ކަމުގެ އިންޒާރެވެ. އައްޑު އަށް ބަލާ އިރު އައްޑޫ އިންޖީނުތަކަށް ވެސް ބާރު ބޮޑުވެ ހިފެހެއްޓެނީ ކިރިޔަކިރިޔާ އެވެ.
ރޯދަ މަސް ފެށުނު އިރު ވެސް ބޯ ފެނަށް ވަނީ ބާރު ބޮޑުވެފަ އެވެ. ޑިމާންޑާ އެއްވަރަށް ފެން ނުއުފެއްދޭތީ ފެނުގެ ޑިމާންޑް މިއޮތީ އިންތިހާ އަށް މަތީގަ އެވެ. ފެނުގެ އަގު ވެސް ދަނީ މަތިވަމުންނެވެ.
މިނަރަލް ވޯޓަ ލިބުމުގެ ދަތިކަން ރާއްޖޭގެ އެކި ކަންކޮޅުތަކުގައި އެބަ ހުއްޓެވެ. މާލެ ފިޔަވައި އެންމެ އާބާދީ ބޮޑު އައްޑޫން ވެސް މިނަރަލް ވޯޓަ ނުލިބެ އެވެ.
އައްޑު އަށް ފެން ގެންނަ ހެޕީ މާކެޓާއި ކޮކާކޯލާއަށް ބޭނުންވާ މިންވަރާ ގާތަށް ވެސް ފެން ނުގެނެވެ އެވެ. އެހެންވެ ފެނުގެ ޑިމާންޑް އައްޑޫގައި ވަރަށް ބޮޑެވެ.
ކާބޯތަކެތީގެ އަގު މިވަނީ ދުވަހަކު ވެސް މައްޗަށް ނުދާ މިންވަރަށް އުފުލިފަ އެވެ. މުލަ ރޯދަ ދުވަހު ކާއްޓެއްގެ އަގު 50-70ރ. އާ އާ ދެމެދަށް އަރައިގެން ދިޔަ އިރު ގިތެޔޮ މިރުސްގެ އަގުވަނީ 700ރ. އަށް އަރައިގެން ގޮސް ފައެވެ.
އާއްމު ކާބޯތަކެތީގެ އަގު ވެސް ވަނީ ނިސްބަތުން ބޮޑުވެފަ އެވެ. ކާޑު ސަބްސިޑީ ކަނޑާލުމާ ގުޅިގެން ކާޑްގެ އަގު ވެސް މި ވަނީ ދުވަހަކު ވެސް ބޮޑު ނުވާވަރަށް ބޮޑުވެފަ އެވެ.
ރައްޔިތުންގެ ފުދުންތެރިކަން އިތުރު ނުވެ، ތަކެތީގެ އަގު އުފުލުމާއި ގުޅިގެން އާއްމުން މިތީ ވަރަށް ކަންބޮޑުވެފަ އެވެ. އަސާސީ ކަންކަން ޔަޤީން ނުވާތީ ޝަކުވާ މި ވަނީ ބޮޑުވެފަ އެވެ.
މި ހާލެއްގައި ދިވެހިންގެ ތެރެއިން އެއް ބަޔަކު ކުރިމަތިލީ ވަޒީފާގެ ގާނޫނުން ލިބިދިން ރަމަޟާން އެލެވަންސް ވެސް ނުލިބި އެވެ. ދެން ޔަގީން ކޮން ކަމެއްތޯ އެވެ؟
އަގު ތިރިވީ ކޮން މުދަލެއްގައިތޯ އެވެ؟ މިހިރީ ހައްތާ ވެސް ރައްޔިތުންގެ ޝަކުވާ އެވެ. މައްސަލައަކީ މި އަޑުތައް އިވޭ ސަރުކާރެއް ނެތް ކަމެވެ.