1. ހޫނު ފެންތަ ނޫނީ ފިނި ފެންތަ؟
ފެންވަރާއިރު ބޭނުންކުރާ ފެނުގެ ފިނިހޫނުމިނަކީ ވަރަށް މުހިންމު ކަމެކެވެ. އެގޮތުން ހޫނު މޫސުމުގައި ފެންވަރަން ޖެހޭނީ ފިނިފެނުންނެވެ. އަދި ފިނި މޫސުމުގައި އެހާ ހޫނު ފެން ބޭނުންކުރުމުގެ ބަދަލުގައި ފެންވެރުން އެންމެ ރަނގަޅީ ތާނެފެނާ ފެނުންނެވެ. އަޔޫރްވެދާ އިން ބުނާ ގޮތުގައި ހަށިގަނޑުގެ ކަރުން ތިރި ދޮންނަންވާނީ ތާފެނާފެނުންނެވެ. އަދި ބޯ ދޮންނަންވާނީ ފިނިފެނުންނެވެ. އެއީ ހޫނުފެނުން ލޮލަށާއި އިސްތަށިގަނޑަށް ގެއްލުން ލިބިދާނެތީއެވެ. މީގެ އިތުރުންވެސް ހޫނުފެން ބޭނުންކުރުމުން ހަންގަނޑު މާބޮޑާށް ހިކޭނެއެވެ.
2. މާގިނައިން ޝޭމްޕޫ ބަދަލުކުރުން
މާގިނައިން ޝޭމްޕޫ ބަދަލު ކުރުމަކީ އިސްތަށިގަނޑަށް ގެއްލުންވާ ކަމެކެވެ. ދިރާސާތަކުން ދައްކާ ގޮތުގައި ބައެއް ހާލަތްތަކުގައި ޝޭމްޕޫ ބަދަލު ކުރުމަކީ އެދެވިގެންވާ ކަމެކެވެ. އެގޮތުން މޫސުމަށާއި ކެއުމަށާއި އުމުރަށް އަންނަ ބަދަލާއި ގުޅިގެން ބޭނުންކުރާ ޝޭމްޕޫ ވެސް ބަދަލުކުރަން ވާނެއެވެ. އެހެންނަމަވެސް އެފަދަ އެއްވެސް ސަބަބަކާއި ނުލައި ކޮންމެ ހަފްތާއަކު ނުވަތަ ކޮންމެ މަހަކު ޝޭމްޕޫ ބަދަލު ކުރުމަކީ ރަނގަޅު ކަމެއް ނޫނެވެ.
3. ރަނގަޅު ޝަވާ ޖެލް އެއް އިޚްތިޔާރުކުރުން
މާގިނައިން ޝަވާ ޖެލް ބޭނުން ކުރުމަކީ އެދެވިގެންވާ ކަމެއް ނޫނެވެ. އެއީ އޭގެ ސަބަބުން ހަށިގަނޑުގައި ހުންނަ ޤުދުރަތީ ތެޔޮތައް ނެތިގެންގޮސް، ހަންގަނޑު ހިކި ހިރުވާގޮތް ވާނެއެވެ. މީގެ އިތުރުންވެސް އޭގެ ސަބަބުން އެކްޒީމާ ފަދަ ހަމުގެ ބަލިތައް ޖެހުން ވެސް އެކަށީގެންވެއެވެ.
4. ސައިބޯނި ފޮހުން
ފެންވަރައިގެން ނިކުންނަ އިރު ބައެއް ފަހަރު ނޮދޮވި ސައިބޯނި ކޮޅެއް ހުރެދާނެއެވެ. އަލުން ފާހާނާ އަށް ވަދެ ފެނުން އެތަން ދޮވުމަކީ އުނދަގޫ ކަމަކަށް ވުމުން ގިނަ މީހުން ކަންތައް ކުރާނެ ގޮތަކީ އެތަންކޮޅު ތުވާލިން ފޮހެލުމެވެ. އެހެންނަމަވެސް އެއީ އެއްގޮތަކަށްވެސް ރަނގަޅު ކަމެއް ނޫނެވެ. ހަންގަނޑުން ރަނގަޅަށް ސައިބޯނި ސާފުކުރުމަކީ ވަރަށް މުހިންމު ކަމެކެވެ. އެހެންނޫނީ ހަންގަނޑު ހިރުވާނެ އެވެ.
5. މާބާރަށް ތުވާލިން ފޮހުން
ފެންވަރައިގެން ނިކުމެ އެހާ ބާރަށް ތުވާލިން ގައި ފޮހުމަށްވުރެ ރަނގަޅުވާނީ މަޑުމަޑުން ފޮހުމެވެ. އެއީ ބާރަށް ފޮހުމުގެ ސަބަބުން ހަންގަނޑުގައި ހުންނަ އިސްތަށިތައް ހަލާކުވެ، ގައި ހިރުވާގޮތް ވެއެވެ. މީގެ އިތުރުން އިސްތަށިގަނޑު ތުވާލިން އޮޅާލުމަކީ ވެސް އިސްތަށިގަނޑު ދެރަކޮށް، އިސްތަށި ފޭބުމުގެ މައްސަލަ ކުރިމަތި ކުރުވާ ކަމެކެވެ.
6. މާގިނަ އިރު ފެންވެރުމުގައި ހޭދަކުރުން
މާގިނައިރު ވަންދެން ފެންވެރުމަކީ ހަންގަނޑު ވަރަށް ބޮޑަށް ހިއްކާލަދޭ ކަމެކެވެ. އަދި ހަންގަނޑު ހިރުވާ ކަމެއްވެސް މެއެވެ. ފެންވެރުމަށްޓަކައި ހޭދަކުރުން އެންމެ ރަނގަޅީ 10 މިނެޓްގެ ވަގުތުކޮޅެކެވެ.