އައްޑޫގައި ކުނި ނަގަން ވެމްކޯ އިން ބޭނުން ކުރާ ވެހިކަލެއް މަގުމަތީގައި ޕާކްކޮށްފައި އޮތް ކާރެއްގައި ޖެހި ގެއްލުންވެއްޖެ އެވެ.
މިއަދު ހެނދުނު މި ހާދިސާ ހިނގާފައި ވަނީ ފޭދޫ ލިޓަސް ފިހާރަ ކައިރީގައި އޮތް ކާރަކާއި ވެމްކޯގެ ވެހިކަލެއް ޖެހިގެންނެވެ. މި ހާދިސާގައި ކާރުގެ އަރިމަތީގައި ވެމްކޯގެ ވެހިކަލް ޖެހި، ކުލަ ކަހައިގެން ގޮސްފައިވެ އެވެ.
އެހެން ނަމަވެސް ކާރަށް އިތުރު އެއްވެސް ގެއްލުމެއް ލިބިފައެއް ނުވެ އެވެ.
މި ހާދިސާއާ ގުޅިގެން ވެމްކޯގެ ވެހިކަލް ދުއްވަން އިން ޑްރައިވަރު ވަނީ ކާރުގެ ވެރިފަރާތާ ވާހަކަ ދެއްކުމަށް ފަހު، އޭނާގެ އަމިއްލަ ހަރަދުގައި ކާރަށް ލިބުނު ގެއްލުން މަރާމާތުކޮށް ދޭނެ ކަމަށް ބުނެފަ އެވެ.
ކާރުގައި ވެމްކޯގެ އުޅަނދު ޖެހުނީ، ކާރާ މާ ބޮޑަށް ކައިރިން ދެވުމުންނެވެ.