-
ލުނބޯ އަކީ ޤުދުރަތީ ބްލީޗިން މާއްދާތަކެއް އެކުލެވިގެންވާ ހަންގަނޑަށް ވެސް ވަރަށް ރަނގަޅު އެއްޗެކެވެ. ކަޅުވެފައި ހުންނަ ތަންތަނުގައި ލުނބޯ ހުތް ހާކާފައި މަސާޖް ކޮށްފައި 10 ވަރަކަށް މިނެޓް ވަންދެން ބަހައްޓާށެވެ. އެ އަށްފަހު ތާފެނާފެނުން ދޮވެލާށެވެ. ދެތިން ހަފްތާ ވަންދެން ކޮންމެ ދުވަހަކު މިގޮތަށް ޢަމަލު ކުރާށެވެ. ތަފާތު ފެނިގެންދާނެއެވެ.
-
ކާޑް (ޔޯގަޓް) އަކީ ވަރަށް ރަނގަޅު މޮއިސްޗުރައިޒާ އެކެވެ. ގިނަ މީހުންނަށް ނޭނގޭ ކަމަކީ ހުތް ކާޑް އަކީ ހަންގަނޑުގެ ކުލަ އަލިކޮށްދޭ އެއްޗެއް ކަމެވެ. ހުތް ކާޑްގެ ތެރެއަށް އެއް ސައިސަމުސާ ވިނެގާ އަދި ގްރެމް ފްލާ އަޅާފައި އެއްކޮށްލާށެވެ. ދެން އެ ޕޭސްޓް ބޭނުންވާ ސަރަޙައްދުގައި ހާކާފައި، 15 މިނެޓް ބެހެއްޓުމަށްފަހު ތާފެނާފެނުން ދޮވެލާށެވެ.
-
ބޭކިން ސޯޑާ އާއި ހިކި ކިރު އެއްކޮށްފައި ބޯ ޕޭސްޓެއް ހަދާލާށެވެ. ދެން އެ ޕޭސްޓް ކަކުލާއި އުޅަނބޮށީގައި ހާކާށެވެ. ފަސް މިނެޓް ބެހެއްޓުމަށްފަހު ދޮވެލާށެވެ. ދެމަސް ވަންދެން ހަފްތާއަކު އެއް ފަހަރު މިގޮތަށް ހަދާށެވެ.
-
އެލޯ ވޭރާ އަކީ ހަންގަނޑު ވަރަށް މަޑުކޮށްދޭ އެއްޗެކެވެ. ތާޒާ އެލޯ ވޭރާ ފަތަކުން އެލޯ ވޭރާ ޖެލް ނެގުމަށްފަހު، ހަރުވެފައި ހުރި ހަން މަތީގައި ހާކާށެވެ. 20 މިނެޓަށް ބެހެއްޓުމަށްފަހު ފިނިފެނުން ދޮވެލާށެވެ. އެއަށްފަހު އެލޯ ވޭރާ މޮއިސްޗުރައިޒާ އެއް ބޭނުންކޮށްލުން ރަނގަޅުވާނެ އެވެ.
-
ހަންގަނޑު މަޑުކުރުމަށްޓަކައި ކާށި ތެލުން ބޭނުންވާ ސަރަޙައްދުތައް މަސާޖުކޮށްލުމަށްފަހު ތާފެނާފެނުން ދޮވެލާށެވެ. އެގޮތަށް ދޮންނައިރު ސައިބޯނު ބޭނުންކޮށްގެން ނުވާނެ އެވެ. ބޭނުންނަމަ ކުޑަ ލުނބޯ ހުތް ފޮދެއްވެސް އެތަނުގައި ހޭކިދާނެ އެވެ.
