ހިތަދޫ ބޯދު މަގުގައި ހުންނަ "ފޭލި" ފިހާރަ ކައިރިން ދެ ސައިކަލް ޖެހި ހިނގި އެކްސިޑެންޓެއްގައި އަންހެނަކަށް ފަރުވާ ދޭން ފަށައިފި އެވެ.
މައުލޫމާތު ލިބިފައިވާ ގޮތުގައި ދެ ސައިކަލް ޖެހި ހިނގި އެކްސިޑެންޓްގައި އެއް ސައިކަލް ދުއްވަން އިނީ އަންހެނަކާއި އޭނާގެ ކުޑަ ދަރިފުޅެވެ. މިހާދިސާގައި ކުޑަ ކުއްޖާގެ ބޯފަޅައިގެން ދިއުން ފިޔަވައި ސީރިއަސް އަނިޔާއެއް ލިބިފައި ނުވާ ކަމަށް މައުލޫމާތު ލިބެއެވެ.
ފޭލި ފިހާރަ ސަރަހައްދުގައި ނުރައްކާތެރި އެކްސިޑެންޓެއް ހިނގިއިރު މިއަދު ހަވީރު 4 އިން ފެށިގެން އައްޑޫގެ ހުރިހާ ސަރަހައްދެއްގައި ފުލުހުން އަންނަނީ ވީސީޕީ ޖަހައިގެން ޓްރެފިކް ބަލަހައްޓަމުންނެވެ.
"ދިވިލިމަތަ" ނަމުގައި މިއަދު ހަވީރު ފުލުހުން މަގު މައްޗަށް ނިކުމެފައިވާ އިރު އެކްސިޑެންޓް ހިނގި ސަރަހައްދާއި މާދުރު ނޫން ހިސާބެއްގައި ވެސް ފުލުހުންގެ ޓްރެފިކް ބަލާ ޕޮއިންޓެއް ހުއްޓެވެ.
ފުލުހުންގެ އައްޑޫ ކޮމާންޑަރ އިންސްޕެކްޓްރ އޮފް ޕޮލިސް ޖަމްޝީދު އަލީ ވިދާޅުވީ އެކްސިޑެންޓްގައި ސީރިއަސް އަނިޔާ ލިބުނު އަންހެން މީހާ އެމްބިއުލާންސްގައި ފަރުވާ ދޭން ފޮނުވާފައިވާ އިރު އެކްސިޑެންޓްގައި އަނެއް ސައިކަލްގައި ތިބި މީހުންނަށްވެސް ކުދި އަނިޔާވެފައިވާ ކަމަށެވެ.