ދެހާސް ބާރަ ވަނަ އަހަރު ޔާޝް ޗޯޕްޅާ ޑައިރެކްޓް ކުރި "ޖަބް ތަކް ހެ ޖާން" ގެ ލީޑް ރޯލް ކުޅުނު ތިން ތަރިން އަނެއްކާ ވެސް އާ ފިލްމަކަށް ސޮއިކޮށްފި އެވެ.
މި ފަހަރު ޝާހްރުކް ހާނާއި އަނުޝްކާ ޝަރްމާ އަދި ކެޓްރީނާ ކެއިފް ސޮއި ކުރި ފިލްމަކީ "ތަނޫ ވެޑްސް މަނޫ" ފަދަ ފިލްމްތައް ބެލުންތެރިންނާ ހަމައަށް ގެނެސް ދީފައިވާ އާނަންދް އެލް ރާއީގެ ފިލްމެވެ.
އަދި ވަކި ނަމެއް ދީފައި ނުވާ ފިލްމުގެ ބަތަލާއިންނާ ބެހޭ ގޮތުން ތަފާތު ގޮތްގޮތަށް ވާހަކަ ދެކެވެމުން ދަނިކޮށް، އާނަންދަ ވަނީ އޭނާގެ ފިލްމުން ޝާހްރުކާ އެކު ފެނިގެން ދާނީ އަނުޝްކާ އާއި ކެޓްރީނާކަން ކަށަވަރުކޮށް ދީފަ އެވެ.
މިހާރު ޝޫޓިން ކުރިއަށްދާ ފިލްމުގައި ޝާހްރުކް ކުޅެނީ ޑްވާފެއްގެ ރޯލެވެ.
މި ފިލްމްވެގެން ދާނީ ޝާހްރުކާ އެކު، އަނުޝްކާ ކުޅޭ ތިން ވަނަ ފިލްމަށެވެ. އޭނާ ބޮލީވުޑަށް 2008 ގައި ތައާރަފުވީ ޝާހްރުކާ އެކު "ރަބް ނެ ބަނާދީ ޖޯޅީ" އިންނެވެ.
އޭގެ ފަހުން އެ ދެ މީހުން އެކުގައި ކުޅުނު ފިލްމަކީ އަންނަ އޮގަސްޓް މަހު ރިލިޒް ކުރާ އިމްތިއާޒް އަލީގެ ފިލްމެވެ.
އާނަންދުގެ މި ފިލްވެގެން ދާނީ ޝާހްރުކާ އެކު ކެޓްރީނާ ކުޅޭ ދެވަނަ ފިލްމަށެވެ.