ހިތަދޫގައި ވަރަށް ގިނަ އަހަރުތަކެއް ވަންދެން ހިންގި ޕޯސްޓް އޮފީސް ބަންދު ކުރުމަށް ފަހު، އައުޓްސޯސްކޮށްގެން އެ އަވަށުގައި ހުޅުވި އެޖެންޓް ޕޯސްޓް އޮފީސް ވެސް ބަންދުކޮށްފި އެވެ.
ހިތަދޫ ބޮޑުމަގުގައި ހިންގި ޕޯސްޓް އޮފީސް، އެ އަަވަށު ބުރިކެޑަ މަގަށް މިދިޔަ އަހަރުގެ ކުރީކޮޅު ބަދަލު ކުރިތާ މާ ގިނަ ދުވަސްތަކެއް ނުވެ ޕޯސްޓް އޮފީސް ބަންދުކޮށް، އެތަނުގެ މުވައްޒަފުން ވަޖީ ފޭދޫ ޕޯސްޓް އޮފީހަށް ބަދަލުކޮށްފަ އެވެ.
އޭގެ ފަހުން ހިތަދޫގައި ހުޅުވި އެޖެންޓް ޕޯސްޓް އޮފީހަށް އެކަށީގެންވާ ގޮތަށް ހިދުމަތް ދެވޭ ގޮތް ނުވެގެން އެތަން މިހާރު ބަންދު ކުރުމާ ގުޅިގެން ހިތަދޫގެ ވަރަށް ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ.
މިހާރު ޕޯސްޓްގެ ހިދުމަތް ހޯދަން ބޭނުން ނަމަ ހިތަދޫ މީހުން އަންނަން ޖެހެނީ ފޭދުއަށެވެ.
ހިތަދޫން ވާހަކަ ދެއްކި ބައެއް މީހުން ބުނި ގޮތުގައި ޕޯސްޓް އޮފީހުގެ ހިދުމަތް ހޯދަން ފޭދު އަށް ދާން ޖެހުމަކީ ރައްޔިތުންނަށް ޖެއްސި ވަރަށް ބޮޑު ތަކުލީފެކެވެ.