ދެހާސް ސާދަ ވަނަ އަހަރު ސާޖިދު ނަދިއަދްވާ ޑައިރެކްޓްކޮށް ބެލުންތެރިންނާ ހަމައަށް ގެނެސް ދިން ކާމިޔާބު ފިލްމް "ކިކް" އަށް ފަހު ސަލްމާން ހާނާއި ޖެކޮލިން ފެނާންޑޭޒްގެ ޖޯޑް އަލުން ސްކްރީނުން ބަލާލުމުގެ ޝައުގުވެރިކަން ވަރަށް ބޮޑުވި އެވެ.
އެހެންވެ ގިނަ ބަޔަކު ތިބީ އެ ދެ މީހުން އާ ފިލްމަކަށް ސޮއި ކުރާނެ އިރަކަށް ބަލަބަލަ އެވެ.
ބޮލީވުޑްގެ އެންމެ ފަހުގެ ހަބަރުތައް ބުނާ ގޮތުން ސަލްމާނާއި ޖެކޮލިން މިހާރު ވަނީ ޑައިރެކްޓަރު ރެމޯ ޑި ސޫޒާ ޑައިރެކްޓް ކުރާ ފިލްމަކަަށް ސޮއިކޮށްފަ އެވެ.
އޭނާ އެންމެ ފަހުން ގެނެސް ދިން ފިލްމަކީ ޓައިގާ ޝްރޮފާއި ޖެކޮލިން ލީޑް ރޯލް ކުޅުނު "ފްލައިމް ޖަޓް" އެވެ.
ރިޕޯޓްތައް ބުނާ ގޮތުން ސަލްމާނާއި ޖެކޮލިން ސޮއި ކުރި ފިލްމަކީ ރެމޯގެ ކާމިޔާބު ޑާންސް މިއުޒިކަލް "އޭބީސީޑީ" ފްރެންޗައިޒްގެ ތިން ވަނަ ފިލްމެވެ.
އެހެން ނަމަވެސް އޭނާ ވަނީ އެކަން ދޮގުކޮށްފަ އެވެ.
ރެމޯ ބުނީ ސަލްމާނާއި ޖެކޮލިން އޭނާގެ ފިލްމަކަށް ސޮއިކޮށްފައިވާ ކަމަށާއި އެކަމަކު އެ ފިލްމަށް އަދި ވަކި ނަމެއް ހަމަޖެހިފައި ނުވާ ކަމަށެވެ.
އޭނާ އަދި ބުނީ ދެން އެންމެ އަވަހަށް މަސައްކަތް ފަށާނީ ވެސް ސަލްމާނާއި ޖެކޮލިން ހިމަނައިގެން ހަދާ ފިލްމް ކަމަށެވެ.
މިއީ ސަލްމާންގެ އަމިއްލަ ފިލްމް ކުންފުނިން އުފައްދާ ފިލްމެކެވެ. މި ފިލްމް އަންނަ އަހަރު ސިނަމާތަކަށް އަންނާނެ އެވެ.
ރެމޯ ބުނީ "އޭބީސީޑީ 3" ހަދާނީ އަންނަ އަހަރު ކަމަށެވެ.