ރާއްޖޭގައި ބާއްވާ އެންމެ ފޯރިގަދަ އެއް ފުޓްސަލް މުބާރާތް ކަމަށްވާ މަރަދޫ ގޯދިއްޔާ ފުޓްސަލް މުބާރާތް މިރޭ ފަށާއިރު މުބާރާތުގައި ވާދަކުރާ ޓީމުތަކާއި ސަޕޯޓަރުން ވެސް ކުޅިވަރުގެ ރޫޙާއި އެއްގޮތަށް ޢަމަލުތައް ބެހެއްޓުމަށް ގޯދިއްޔާ ޖަމިއްޔާ އިން އެދިއްޖެ އެވެ.
ގޯދިއްޔާގެ ޖެނެރަލް ސެކްރެޓަރީ ހުސެއިން އާބިދް ވިދާޅުވީ، ހުރިހާ ޓީމުތަކުން ވެސް މުބާރާތަކީ ކާމިޔާބު މުބާރާތަކަށް ހެދުމަށްޓަކައި މަސައްކަތް ކޮށްދެއްވުމަށް އެދިވަޑައިގެންފައެވެ.
"ހުރިހާ ޓީމްތަކުން ވެސް މުބާރާތަކީ ކާމިޔާބު މުބާރާތަކަށް ހެދުމަށްޓަކައި މަސައްކަތްކޮށް އަދި ޓީމްތަކުގެ ސަޕޯޓަރުން ވެސް ކުޅިވަރުގެ ރޫހާ ޚިލާފް ނުވާގޮތަށް ސަޕޯޓްކޮށްދިނުމަކީ ޖަމިއްޔާގެ ވަރަށް ބޮޑު އެދުމެއް"
މަރަދޫ ވެންބޮޅަފިށި ސްޓޭޑިއަމްގައި ކުރިއަށްދާ ގޯދިއްޔާ ފުޓްސަލް މުބާރާތުގައި ޖުމްލަ 20 ޓީމަކުން 280 ކުޅުންތެރިންގެ ހުނަރު ފެނިގެންދާ އެވެ.
ޖުމްލަ 48 މެޗް ކުޅުމަށް ހަމަޖެހިފައިވާ މި މުބާރާތުގެ ކުރިއަށް ދާނީ މިރެއިން ފެށިގެން މިމަހުގެ 24 ވަނަ ދުވަހުގެ ނިޔަލަށެވެ.