އައްޑޫގެ އިންތިހާބީ ކައުންސިލަރުން ހުވާ ކުރެއްވުމުގެ ރަސްމިއްޔާތު މިރޭ ބާއްވާނެ ކަމަށާއި އެކަމާ ގުޅޭ ތައްޔާރީތައް ވަމުން އަންނަ ކަމަށް ކައުންސިލް އިދާރާ އިން ބުނެފި އެވެ.
ހުވާ ކުރުމުގެ ރަސްމިއްޔާތު އޮންނާނީ މިރޭ 10:00 ގައި ހިތަދޫ ޝަރަފުއްދީން ސްކޫލްގަ އެވެ.
ހުވާ ކުރުމަށް ފަހު، ކައުންސިލްގެ ފުރަތަމަ ބައްދަލުވުން ބާއްވައި މޭޔަރާއި ޑެޕިއުޓީ މޭޔަރު ހޮވުން ވެސް މިރޭ އޮންނާނެ އެވެ.
އައްޑު އަށް މި ފަހަރު ހަތް ކައުންސިލަރުން އިންތިހާބުކޮށްފައިވާ އިރު، މިހާރުގެ ކައުންސިލްގައި ތިއްބެވި ތިން ބޭފުޅަކު ވެސް ހިމެނިވަޑައިގަންނަވަ އެވެ.
އެއީ ހިތަދޫ އުތުރު ދާއިރާ ކައުންސިލަރު އަބްދުﷲ ސޯދިގް (ސޯބެ) އާއި ދެކުނު ދާއިރާ ކައުންސިލަރު މުހައްމަދު ޔަސްރިފްގެ އިތުރުން ފޭދޫ ކައުންސިލަރު އަލީ ފަހުމި އަހުމަދެވެ.
މިއީ ސޯބެ ކައުންސިލަށް ހޮވިވަޑައިގަތް ތިން ވަނަ ފަހަރެވެ. އަދި ފަހުމީ އާއި ޔަސްރިފްގެ ދެވަނަ ދައުރެވެ.
މުޅިން އަލަށް ކައުންސިލަށް ހޮވިވަޑައިގަތް ބޭފުޅުންނަކީ ހުޅުދޫ ކައުންސިލަރު އިބްރާހީން ޝުކުރީ އާއި މީދޫ ކައުންސިލަރު ހުސައިން ހިޔާޒާއި މަރަދޫ ކައުންސިލަރު ފައިސަލް އިބްރާހީމްގެ އިތުރުން ހިތަދޫ މެދު ދާއިރާ ކައުންސިލަރު ޖަމްޝީދާ މުހައްމަދެވެ.
ޖަމްޝީދާއަކީ އައްޑޫ ސިޓީ ކައުންސިލަށް ހޮވިވަޑައިގެންނެވި ފުރަތަމަ އަންހެން ބޭފުޅާ އެވެ.