ބޮލީވުޑްގެ މަޝްހޫރު އެކްޓަރު އަނިލް ކަޕޫރް އޭނާގެ ފިރިހެން ދަރިފުޅި ހާޝްވަރްދަން ކަޕޫރާ އެކު ފިލްމެއް ކުޅެން ސޮއިކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
ހާޝް ބޮލީވަށް ނިކުތީ މިދިޔަ އަހަރު ރިލީޒް ކުރި "މިރްޒިޔާ" އިންނެވެ.
ރިޕޯޓްތައް ބުނާ ގޮތުން އަނިލް އާއި ހާޝް ސޮއިކޮށްފައި ވަނީ އިންޑިއާގެ ޕްރޮފެޝަނަލް ޝޫޓަރު އަބިނާވް ބިންދްރާގެ ހަޔާތުގެ މައްޗަށް ބިނާކޮށް ހަދާ ފިލްމަށެވެ. މި ފިލްމްގައި އަބިނާވްގެ ރޯލް ކުޅެން ހަމަޖެހިފައި ވަނީ ހާޝް އެވެ.
އެކަމާ ބެހޭ ގޮތުން ސުވާލު ކުރުމުން އަނިލް ވަނީ ދެބަފައިން އެއް ފިލްމެއްގައި ސްކްރީން ހިއްސާ ކުރަން ހުށަހަޅާފައިވާކަން ކަށަވަރުކޮށް ދީފަ އެވެ.
"އެހެން ނަމަވެސް އެކަމާ ބެހޭ ގޮތުން އަދި ވާހަކަ ދައްކަން ތަންކޮޅެއް އަވަސް،" ބަތަލާ ސޯނަމް ކަޕޫރުގެ ވެސް ބައްޕަ ބުންޏެވެ. "ފިލްމާ ބެހޭ ގޮތުން ހުރިހާ ކަމެއް ހަމަޖެހުނީމަ އެއާ ބެހޭ ގޮތުން ވާހަކަ ދައްކާނަން."
އަނިލް އަދި ބުނީ ހާޝްއާ އެކު މަސައްކަތްކޮށްލަން ވަރަށް ބޮޑަށް ބޭނުންވާ ކަމަށާއި އަބިނާވްގެ ބައޮޕިކަކީ ދެ މީހުން އެކުގައި ފެނިގެންދާ ފިލްމަށް ވެދާނެ ކަމަށެވެ.
ރިޕޯޓްތައް ބުނާ ގޮތުން އެ ބައޮޕިކްގެ މަސައްކަތް މި އަހަރުގެ އޮކްޓޯބަރުގައި ފަށަން ވަނީ ހަމަޖެހިފަ އެވެ.
އަނިލް ދެން އެންމެ އަވަހަށް ފެނިގެން ދާނީ އޭނާ އަށް ބޮޑުބޭބެ ކިޔާ އަރުޖުން ކަޕޫރާ އެކު ކުޅެފައިވާ "މުބާރަކަން" އިންނެވެ. އެ ފިލްމް ރިލީޒް ކުރާނީ އަންނަ މަހުގެ 28 ގަ އެވެ.
ހާޝް ދާދި ފަހުން ވަނީ އަދިތިޔަ މޮޓްވާނީގެ "ބަވްނޭޝް ޖޯޝީ" ގެ މަސައްކަތް ނިންމާލައިފަ އެވެ.