އައްޑޫގެ ގުޅިފައިވާ ހަތަރު އަވަށުގެ ނަރުދަމާ ނިޒާމް ގާއިމް ކުރުމުގެ މަޝްރޫއުގެ ތެރެއިން އަގަކާ ނުލައި ނަރުދަމާގެ ހިދުމަތް ގުޅައި ދިނުމުގެ ފުރުސަތު އެންވަޔަރަމަންޓް މިނިސްޓްރީން ހުޅުވާލައިފި އެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި މޯލްޑިވްސް ވޯޓަ ސްވަރޭގް ކޮމްޕެނީ (އެމްޑަބްލިއުއެސްސީ) އާ ހަވާލުކޮށްގެން ކުރިއަށް ގެންދާ މަޝްރޫއުގެ ދަށުން ނަރުދަމާގެ ޚިދުމަތް ގުޅުމުގެ ފުރުސަތު ހުޅުވާލާފައި ވަނީ ހިތަދޫ، މަރަދޫ، މަރަދޫފޭދޫ އަދި ފޭދުއަށެވެ.
މިނިސްޓްރީން ބުނީ މިއަދުން ފެށިގެން މަރަދޫ، މަރަދޫފޭދީ އަދި ފޭދޫން ހިދުމަތަށް އެދޭ ފަރާތްތަކަށް ފޭދޫގައި ހުންނަ އެމްޓީސީސީ ޕްރެޖެކްޓް އޮފީހުން ނަރުދަމާގެ ހިދުމަތަށް އެދޭ ފޯމް މިހާރު ދޫކުރަމުން އަންނަ ކަމަށެވެ.
މީގެ އިތުރުން ހިތަދޫގެ އުތުރާއި ދެކުނުން ހިދުމަތަށް އެދޭ މީހުންނަށް ވެސް މިހާރު އަންނަނީ ފޯމް ދޫކުރަމުންނެވެ.
ހިތަދޫން ފޯމް ދޫކުރާނީ އެ އަވަށުގައި ހުންނަ އެމްޑަބްލިއުއެސްސީގެ ސައިޓް އޮފީހުންނެވެ.
ފޯމް ހުށަހަޅަން ޖެހޭ އެންމެ ފަހު ތާރީހަކީ އަންނަ މަހުގެ 4 ވަނަ ދުވަހެވެ.
އައްޑޫގެ ނަރުދަމާ ނިޒާމްގެ އަމަލީ މަސައްކަތް ރަސްމީކޮށް އިފުތިތާހު ކުރީ މިދިޔަ އެޕްރީލް މަހުގެ ތެރޭގަ އެވެ.