ދެހާސް ފަސް ވަނަ އަހަރާއި 2015 އަހަރާއި ދެމެދު ދުނިޔޭގައި ބޭރަށް ހިނގުމުގެ ސަބަބުން މަރުވާ ކުޑަކުދިންގެ އަދަދު 1/3 ކުޑަވެއްޖެ ކަމަށް ދިރާސާވެރިން ހޯދައިފި އެވެ.
ދިރާސާއިން ދައްކާފައިވާ ގޮތުގައި ބޭރަށް ހިނގުމުގެ ސަބަބުން މަރުވާ ކުޑަކުދިންގެ އަދަދު މަދުވެފައި ވަނީ ސާފުތާހިރު ފެނާއި ނަރުދަމާގެ ނިޒާމު ޤާއިމް ކުރެވުމުގެ ސަބަބުންނެވެ.
އަލަށް ތަޢާރަފް ކުރެވުނު ވެކްސިންތަކަކީ ވެސް އެ މައްސަލަ ކުޑަވެގެން ދިޔަ އެއް ސަބަބެވެ.
އެހެންނަމަވެސް، މިހާރުވެސް ބޭރަށް ހިނގުމަކީ ދުނިޔޭގައި ކުޑަކުދިން މަރުވާން ދިމާވާ ހަތަރުވަނަ އަށް އެންމެ ބޮޑު ސަބަބެވެ. އެގޮތުން އަހަރެއްގެ މައްޗަށް އުމުރުން ފަސް އަހަރުވުމުގެ ކުރިން ގާތްގަނޑަކަށް 500،000 ކުޑަކުދިން ބޭރަށް ހިނގުމުގެ ސަބަބުން މަރުވެއެވެ.
ބޭރަށް ހިނގުމަކީ ނުސީދާގޮތުން އިތުރު މަރުތަކަށްވެސް ޒިންމާވާ ކަމެކެވެ. އެއީ އެކަމުގެ ސަބަބުން ނިއުމޯނިއާ އާއި މީސްލްސް ފަދަ އެހެނިހެން ބަލިތައް ޖެހުމުގެ ފުރުސަތު ބޮޑުވެގެން ދާތީއެވެ.
ގްލޯބަލް ބާޑެން އޮފް ޑިޒީސް ގެ ދިރާސާއިން އެމެރިކާގެ ދިރާސާވެރިން ހޯދާފައިވާ ގޮތުގައި ބޭރަށް ހިނގުމުގެ ސަބަބުން މަރުވާ 42 ޕަސަންޓް މީހުން ނިސްބަތްވަނީ ނައިޖީރިއާ އާއި އިންޑިއާ އަށެވެ.
ބޭރަށް ހިނގުމުގެ ސަބަބުން ޖެހޭ ބަލިތައް ފެތުރެނީ ބޮޑުކަމުދާ ތަކެތީގެ ނަޖިހާއި އެކުވެފައިވާ ފެނުގެ ޒަރިއްޔާއިންނެވެ. އެފަދަ ބަލިތަކަކީ މަސައްކަތް ކޮށްފިނަމަ، ހުއްޓުވޭނެ އަދި ފަރުވާދެވޭނެ ބަލިތަކެވެ.