ދެ ފްރެންޑްސް އަށް ފަސޭހަ މޮޅެއް، ކަޒިންސް އަށް ހަނި މޮޅެއް

ވީބީ ގޯދިއްޔާ ފުޓްސަލް ކަޕް 2017 ގެ ދެވަނަ ރޭގައި ކުޅުނު މެޗުތައް ފްރެންޑްސް ޔުނައިޓެޑް، ފްރެންޑްސް ކުލަބު އަދި ކަޒިންސް އެފްސީ ކާމިޔާބުކޮށްފި އެވެ.

ރޭގެ ފުރަތަމަ މެޗުގައި ޔުނައިޓެޑް ފްރެންޑްސްއާއި ޒެލޯން ބައްދަލުކުރި މެޗު 1-6 އިން ކާމިޔާބުކޮށްފައިވަނީ ޔުނައިޓެޑް ފްރެންޑްސްއެވެ.

ފުރަތަމަ ހާފުގައި ޔުނައިޓެޑް ފްރެންޑްސްއިން ހަތަރު ލަނޑު ޖަހާފައިވާއިރު ޒެލޯންއަށް ޖެހުނީ އެންމެ ލަނޑެކެވެ.
ދެވަނަ ހާފުގައި ޒެލޯންއަށް އިތުރު ލަނޑެއް ކާމިޔާބުކުރެވިފައިނުވާއިރު ޔުނައިޓެޑް ފްރެންޑްސް ވަނީ އިތުރު ދެލަނޑު ޖަހާފައެވެ.

މެޗުގައި ޔުނައިޓެޑް ފްރެންޑްސްގެ އަހުމަދު ޝާފިއުއާއި އަލީ ޝިފާއު ވަނީ ދެ ލަނޑު ޖަހާފައެވެ. މީގެ އިތުރުން ލަނޑު ޖަހާފައިވަނީ އަޔާޒް އަހުމަދާއި އަބްދުﷲ ޒިޔާންއެވެ.

ރޭގެ ދެވަނަ މެޗުގައި ފްރެންޑްސް ކުލަބާއި މާކިއުރީ ޔުނައިޓެޑު ބައްދަލުކުރި މެޗު ފްރެންޑްސް ވަނީ 1-9 ގެ ބޮޑު ތަފާތަކުން ކާމިޔާބުކޮށްފައެވެ.

ފުރަތަމަ ހާފުގައި ފްރެންޑްސްއިން ހަތަރު ލަނޑު ޖަހާފައިވާއިރު ދެވަނަ ހާފުގައި 5 ލަނޑު ވަނީ އެޓީމުގެ ފަރާތުން ފެނިގެން ގޮސްފައެވެ. މާކިއުރީގެ ހަމައެކަނި ލަނޑު ފެނިގެން ގޮސްފައިވަނީ ފަހު ހާފުގައެވެ.

ފްރެންޑްސްއަށް ލަނޑުތައް ކާމިޔާބުކޮށްދީފައިވަނީ އިބްރާހިމް މުބީން އަހުމަދު ރަޝީދު، ރިހާމް އަބްދުލްޣަނީގެ އިތުރުން މުހައްމަދު ރިފްއަތެވެ. ފްރެންޑްސްގެ 9 ގޯލުގެ ތެރެއިން 5 ގޯލު މުބީން ޖަހާފައިވާއިރު ރިފްއަތާއި ރިހާމް، ދެކުޅުންތެރިންވެސް ވަނީ ކޮންމެ ކުޅުންތެރިޔަކަށް ދެލަނޑު ޖަހާފައެވެ. މާކިއުރީގެ ހަމައެކަނި ލަނޑު ފެނިގެން ގޮސްފައިވަނީ މުހައްމަދު މަމްނޫންގެ ފަރާތުންނެވެ.

ރޭގެ ފަހު މެޗުގައި ކަޒިންސް އެފްސީއާއި އެސްއެމްޓީ ބައްދަލުކުރި މެޗު ހަނިގޮތަކަށް ކަޒިންސް ވަނީ ކާމިޔާބުކޮށް ފެށުން ރަނގަޅު ކޮށްފައެވެ. މެޗުގެ ފުރަތަމަ ހާފުގައި ދެޓީމުން ކުރެ އެއްވެސް ޓީމަކަށް ލަނޑެއް ޖެހިފައިނުވާއިރު ދެވަނަ ހާފުގައި ކަޒިންސް ވަނީ ދެ ލަނޑު ޖަހާފައެވެ.

ކަޒިންސްގެ ލަނޑުތައް ފެނިގެން ގޮސްފައިވަނީ މުހައްމަދު ފާރިޝް އާދަމްގެ އިތުރުން އަހުމަދު ހުސެއިންގެ ފަރާތުންނެވެ. އެސްއެމްޓީގެ ހަމައެކަނި ލަނޑު ޖަހާފައިވަނީ އަހުމަދު ތޮލާލްއެވެ.