ހިތަދޫ ހިރާ ސްކޫލް ހިންގާނެ އިމާރާތެއް ހެދުމަށްޓަކައި، އެ ސްކޫލްގެ ފަރާތުން ފަންޑެއް ހުޅުވައި، ފައިސާ ހަދިޔާ ކުރުމުފެ ފުރުސަތު ހުޅުވާލައިފި އެވެ.
ގައުމީ އާ ކަރިކިއުލަމްއަށް އިނގިރޭސި މީޑިއަމްއަށް ކިޔަވައިދޭ މި ސްކޫލް ހިންގަނީ އަމިއްލަ ފަރާތަކުން ހަމަޖައްސައި ދީފައިވާ ތަނެއްގަ އެވެ. އެހެން ނަމަވެސް އެތަނަށް ވަނީ ޖާގައިގެ ދަތިކަން ވެސް ވަރަށް ބޮޑަށް ކުރިމަތިވެފަ އެވެ.
ހިރާ ސްކޫލް އިމާރާތް ކުރަން ސަރުކާރުން ވަނީ ހިތަދޫން ބިމެއް ވެސް ހަމަޖައްސައި ދީފަ އެވެ.
އެއީ ހިތަދޫ ލިންކް ރޯޑް ސަރަހައްދުން ދޫކޮށްފައިވާ 39،000 އަކަފޫޓްގެ ބިމެކެވެ.
ހިރާ ސްކޫލްގެ އާ އިމާރާތް ޑިޒައިންކޮށްފައި ވަނީ 12 ކްލާސް ރޫމާއި ހޯލަކާއި ލައިބްރަރީއަކާއ ލެބޯރެޓަރީ ފެސިލިޓީއެއް ވެސް ހިނެނޭ ގޮތަށެވެ.
އެހެންވެ ހިރާގެ މެނޭޖްމަންޓުން ވަނީ ސްކޫލްގެ އާ އިމާރާތް އެޅުމަށް އެކި ފަރާތްތަކުގެ ދީލަތި އެހީ އަށް އެދިފަ އެވެ.
އެ ސްކޫލްގެ ފޭސްބުކް ޕޭޖްގައި ހިއްސާކޮށްފައިވާ ޕޯސްޓެއްގައި ބުނީ ފަންޑް ހޯދަން "ލޯންޗްގުޑް" ގެ ނަމުގައި އޮންލައިން ކެމްޕޭނެއް ވެސް ފަށާފައިވާ ކަމަށް ބުނެފަ އެވެ. އެ ކެމްޕޭންގެ ލިންކަކީ www.launchgood.com/hiraschool އެވެ.
މީގެ ހަތް އަހަރު ކުރިން ހިރާ ފައުންޑޭޝަނުން 50 ދަރިވަރުންނާ އެކު ފެށި ސްކޫލްގައި މިހާރު 400 އެއްހާ ދަރިވަރުން ކިޔަވަ އެވެ.