އަންނަ އޮކްޓޯބަރު މަހުގެ 29 ވަނަ ދުވަހުން ފެށިގެން ސްރިލަންކަން އެއާލައިންގެ ދަތުރުތައް އޮސްޓްރޭލިއާގެ މެލްބަން އަށް ފަށަން ނިންމައިފި އެވެ.
އެ އެއާލައިންގެ ރާއްޖޭގެ އެޖެންޓް އޭސް އޭވިއޭޝަން ސާވިސަސް މޯލްޑިވްސް އިން ބުނީ މެލްބަން އަށް ދަތުރުތައް ފެށުމާއެކު ދުވާލަކު އެއް ފްލައިޓް ކޮލަމްބޯއިން މެލްބަން އަށް އޮންނާނެ ކަމަށެވެ.
ފްލައިޓް އަގުތަކަށް ބަލާ އިރު ދިވެހިންނަށް އިކޮނޮމީ ކްލާހުގެ އެއްކޮޅު ޓިކެޓެއް ވިއްކަނީ 550 ޑޮލަރަށެވެ. އަދި ރިޓާން ޓިކެޓް ވިއްކަނީ 1،117 ޑޮލަރަށެވެ.
ބިޒްނަސް ކްލާހުން އެއްކޮޅު ނަމަ 1،159 ޑޮލަރެވެ. އަދި ދެކޮޅު ނަމަ 1،980 ޑޮލަރެވެ.
ޔޫއެލް އިން ބުނީ މެލްބަން އަށް ކުރާ ދަތުރުތައް ފަށާ މައި އެއާޕޯޓަކީ ލަންކާގެ ބަންޑާރަނައިކެ އިންޓަނޭޝަނަލް އެއާޕޯޓް ކަމަށެވެ.
ފްލައިޓް ޝެޑިއުލށް ބަލާ އިރު މާލޭން ކޮލަމްބޯ އަށް ފުރާ ގަޑިއަކީ މާލެ ގަޑިން ރޭގަނޑު 8:40 ގަ އެވެ. އެއަށް ފަހު ކޮލަމްބޯއިން މެލްބަން އަށް ފުރާނީ ރާއްޖެ ގަޑިން ރޭގަނޑު 11:20 ގަ އެވެ.
ކޮލަމްބޯއިން މެލްބަން އަށް ކުރާ ދަތުުރުގެ ދިގު މިނަކީ 11 ގަޑިއިރު އެވެ.